काठमाडौं । बसिर अहमेदको अर्धशतकप्रेरित नेपाल ‘ए’ ले तीन खेलको एकदिवसीय शृंखलाअन्तर्गत पहिलो खेलमा क्यानडा–११ सामु २१७ रनको लक्ष्य प्रस्तुत गरेको छ ।

आइतबार मूलपानीस्थित क्रिकेट मैदानमा जारी खेलमा टस हारेर ब्याटिङमा आएको नेपाल ‘ए’ निर्धारित ५० ओभरमा आठ विकेट गुमाएर २१६ रनको योगफल खडा गर्‍यो ।

नेपालका बसिर अहमेदले ५० रन बनाए । उनले ५५ बलमा तीन चौका र एक छक्का प्रहार गरे । १३६–६ को अवस्थाबाट बासिरले विवेक यादवसँग सातौँ विकेटका लागि ९७ रनको साझेदारी गर्दै नेपाललाई सम्मानजनक योगफलसम्म डोहोर्‍याएका हुन् । विवेकले ३४ बलमा एक चौका र एक छक्कासहित २१ रन थपे ।

यस्तै, राशिद खानले ४० रन बनाए । राशिदले ६६ बलमा पाँच चौका प्रहार गरे । ६–४ को अवस्थाबाट राशिदले किरण ठगुन्नासँग पाँचौँ विकेटका लागि चार रनको साझेदारी गर्दै नेपालको इनिङ सम्हालेका थिए । किरणले टिमको खातामा ३२ बलमा तीन चौकासहित २५ रन थपे । 

ओपनर मयन यादवले ५६ बलमा चार चौका र एक छक्कासहित ३५ रन जोडे । सन्दीप जोराले १४ रन थप्दा अन्यले भने दोहोरो अंकमा रन बनाएनन् ।

क्यानडा–११ का कप्तान साद जफरले तीन विकेट लिए । १० ओभर बलिङ गरेका जफरले एक मेडन राख्दै ३० रन खर्चिए । इश्वरजित सोहीले दुई विकेट लिए । डिलोन हाइलाइजर, हर्ष थाकेर र साहिद अहमदजाईले समान एक विकेट लिए ।

नेपाली क्रिकेटको इतिहासमा ‘ए’ टिमले खेलेको यो पहिलो शृंखला हो । आजको खेलपछि नेपालले मंगलबार दोस्रो र बिहीबार शृंखलाको तेस्रो खेल खेल्नेछ ।