काठमाडौं । नेपाली कांग्रेसको आसन्न महासमिति बैठकमा सहभागी हुने प्रतिनिधिबाट जनही तीन हजार रुपैयाँ दर्ता शुल्क लिइने भएको छ । प्रवेश र दर्ता शुल्कबापत उक्त रकम लिने निर्णय गरिएको पार्टी र महासमिति बैठक प्रचार विभाग प्रमुख मीन विश्वकर्माले जानकारी दिए ।

महासमिति बैठकमा पार्टीले बिहानको चियानास्ता, खाना र दिउँसो चिया बिस्कुट (हाई–टी)को व्यवस्था गर्नेछ । साँझको खाना भने प्रतिनिधि आफैँले व्यवस्थापन गर्नुपर्ने हुन्छ । बेलुका बसोबासको व्यवस्था पनि प्रतिनिधि आफैँले गर्नुपर्ने कांग्रेसले जानकारी गराएको छ ।

“विगत हेरेर हामीले निर्णय गरेका हौँ । बिहानको चियानास्ता, खाना र दिउँसोको हाई–टीको व्यवस्था हुनेछ । साँझको बसोबास र खाना भने प्रतिनिधिहरू आफैँले व्यवस्थापन गर्नुहुनेछ,” प्रचार विभाग प्रमुख विश्वकर्माले बाह्रखरीसित भने ।

शुल्क तिरेर खान चाहनेलाई महासमिति बैठकस्थलबाहिर भोजन स्टलहरू राखिने उनले बताए ।

प्रचारका निम्ति तीनदेखि पाँच हजारसम्म पार्टीको झन्डा बैठकस्थल र उपत्यकाका विभिन्न ठाउँमा राखिने भएको छ । तीन हजारभन्दा बढी प्रचारात्मक स्टिकर तयार गरिने प्रचार विभागले जानकारी गराएको छ ।

महासमिति सदस्यहरूलाई बैठकस्थलमा पुर्‍याउन २० बसको व्यवस्था गर्ने तयारी छ । साँगा, सूर्यविनायक, कोटेश्वर, कलंकी, चाबेल, गौशालालगायत स्थानबाट महासमिति सदस्यहरूलाई ती बसमार्फत गोदावरी लगिनेछ ।

कांग्रेस महासमिति बैठक यही फागुन ७ देखि १० गतेसम्म ललितपुरको गोदावरीमा आयोजना गरिँदै छ ।

दुई वर्षअघि सम्पन्न पार्टीको १४औँ महाधिवेशनमा नेतृत्व मात्र चयन गरिएको थियो । पार्टीको आर्थिक, सामाजिक, सांस्कृतिक, राजनीतिक, कूटनीतिकलगायत नीति कस्तो हुने भन्ने टुंगो लगाइएको छैन । सोही कारण कांग्रेसको नीति महाधिवेशनलाई महत्त्वका साथ हेरिएको छ । महासमिति बैठकलाई नीति महाधिवेशनका रूपमा सम्पन्न गर्ने कांग्रेसले निर्णय गरिसकेको छ ।

महासमिति बैठक सुरु हुन ६ दिन मात्र रहँदा पनि २४ निर्वाचन क्षेत्रबाट प्रतिनिधि चयन गर्नै बाँकी छ । प्रतिनिधि चयन हुन नसकेका जिल्लामा के गर्ने भन्ने विषयमा बैठक बसेर निर्णय गरिने पार्टी निर्वाचन समिति सदस्यसचिव जगन्नाथ श्रेष्ठ जानकारी दिए ।

“हामी छलफलमा छौँ । प्रतिनिधि चयन हुन बाँकी निर्वाचन क्षेत्रको विषयमा चाँडै निर्णय हुन्छ,” उनले भने ।

गएको माघ २० गतेभित्र १६५ वटै निर्वाचन क्षेत्रबाट प्रतिनिधि चयन कार्य सकाउने तयारी थियो । विवादका कारण त्यो सम्भव नभएको पार्टी निर्वाचन समितिले जानकारी गराएको छ ।

निर्वाचन समितिले उपलब्ध गराएको विवरणानुसार, एउटा निर्वाचन क्षेत्र रहेको भोजपुरमा महासमिति सदस्य चयन कार्य नै सुरु गरिएको छैन ।

चार निर्वाचन क्षेत्र रहेका बारा र पर्सामा पनि महासमिति प्रतिनिधि चयनका निम्ति प्रक्रिया सुरु गराउन नसकिएको निर्वाचन समितिले जानकारी गराएको छ ।

सिन्धुली–२, काठमाडौं–५ र ६ बाट समेत प्रतिनिधि चयन गर्न बाँकी छ ।  एउटा मात्र निर्वाचन क्षेत्र रहेका दोलखा, रामेछाप, पर्वतमा पनि प्रतिनिधि चयनको काम बाँकी छ । दाङ–३ र कञ्चनपुर–१ बाट पनि प्रतिनिधि चयन गरिएको छैन ।

दुई निर्वाचन क्षेत्र रहेको धादिङबाट पनि प्रतिनिधि चयन गर्न बाँकी छ । निर्वाचन समितिका अनुसार, खोटाङ र सप्तरीबाट प्रतिनिधि चयन गरिए पनि विवाद छ । ओखलढुंगामा समेत विवाद रहेको समितिले जनाएको छ ।

कांग्रेस विधानको नियम ११ को उपनियम ३ मा महासमिति सदस्यको व्यवस्था छ । उक्त व्यवस्थाअनुसार, समानुपातिक प्रतिनिधत्व हुने गरी एउटा निर्वाचन क्षेत्रबाट ११ निर्वाचित र जिल्ला सभापति पदेनसहित १२ महासमिति सदस्य रहन्छन् ।

महासमिति सदस्य बन्न महाधिवेशन प्रतिनिधि हुनुपर्ने विधानमा व्यवस्था छ । “प्रतिनिधिसभा क्षेत्रीय अधिवेशनले केन्द्रीय महाधिवेशन प्रतिनिधिमध्येबाट दुई महिलासहित सातजना प्रत्यक्ष र महिला, दलित, आदिवासी जनजाति, खसआर्य, मधेसी, थारु, मुस्लिम, पिछडिएको क्षेत्रबाट चारजना प्रतिनिधिसभा क्षेत्रको जनसंख्याको बनोटअनुसार तोकिएबमोजिम समानुपातिक आधारमा केन्द्रीय महासमिति सदस्य निर्वाचित गर्नेछ,’ विधानमा लेखिएको छ ।

कांग्रेस महासमिति बैठकका निम्ति दुई हजार २०० जनाभन्दा बढी प्रतिनिधि चयन हुन्छन् । १६५ निर्वाचन क्षेत्रबाट निर्वाचित भएर करिब दुई हजार प्रतिनिधि आउँछन् । पार्टी विधानको दफा १८ मा महासमिति गठनसम्बन्धी व्यवस्था छ । वर्तमान केन्द्रीय कार्यसमिति सदस्य स्वतः सदस्य महासमितिमा रहन्छन् ।

प्रतिनिधिसभा निर्वाचन क्षेत्रबाट निर्वाचित भएर आएका, निवर्तमान केन्द्रीय सभापति, उपसभापति, महामन्त्री, कोषाध्यक्ष, सहमहामन्त्री र केन्द्रीय सदस्य एक अवधिका निम्ति महासमिति सदस्य हुने व्यवस्था छ ।

बैठकमा पर्यवेक्षकसहित लगभग २५ सयजनाले भाग लिने पार्टीको अनुमान छ । कांग्रेसले प्रतिनिधिहरूबाट मात्र ६६ लाख रुपैयाँभन्दा बढी रकम संकलन गर्ने देखिएको छ ।