काठमाडौं । राष्ट्रियसभा सदस्य डा. विमला राई पौड्यालले त्रिभुवन विश्वविद्यालयको उपकुलपतिमा परीक्षण भइसकेका मान्छेलाई ‘सर्टलिस्ट’मा पारिएको भन्दै आपत्ति जनाएकी छन् । आइतबार राष्ट्रियसभा बैठकमा उनले त्रिभुवन विश्वविद्यालयमा पहिले नै परीक्षण भइसकेका व्यक्तिहरूलाई उपकुलपतिको ‘सर्टलिस्ट’मा पारिएको भन्दै आपत्ति जनाएकी हुन् ।
उनले विश्वविद्यालयको नेतृत्वमा रहेर पनि कुनै प्रगति गर्न नसकेका र त्रिविलाई ‘र्याङकिङ’मा पछाडि धकेल्नेहरू नै सर्टलिस्टमा परेका भन्दै नियुक्तिमा राजनीतिक हस्तक्षेप हुन सक्ने आशंका व्यक्त गरिन् । उनले ‘छनोट समितिले पुरानै अनुहारलाई विश्वविद्यालयको नेतृत्व दिन लागेको हो ?’ भनी प्रश्न समेत गरिन् ।
उनले ‘बौद्धिक चोरीको आरोप लागेका र अख्तियार दुरुपयोग अनुसन्धान आयोगबाट मुद्दा चलाइएकालाई किन उपकुलपतिको छनोट लिस्टमा राखियो ?’ भनेर प्रश्न गरिन् ।
“...फेरि पनि प्रधानमन्त्रीलाई मेरो एउटै प्रश्न छ– राजनीतिक हस्तक्षेप हुन दिन्न भनेर संकल्प गर्दै गर्दाखेरि टेस्टेड र फेल भएका अनुहारहरूलाई फेरि विश्वविद्यालयमा ल्याउन छानेका हो त्यो समितिले ? फेल भइसकेका मान्छेहरूलाई फेरि किन ल्याएको ?,” उनले प्रश्न गरिन्, “कहिले बौद्धिक चोरीको आरोप लागेका, कहिले अख्तियारबाट मुद्दा चलेका मान्छेहरूलाई किन ल्याएको विश्वविद्यालयको छनोटमा ?”
उनले त्रिभुवन विश्वविद्यालयप्रतिको विश्वास र भरोसा टुट्दै गएको पनि बताइन् । न्युज एजेन्सी नेपाल
