काठमाडौं । भक्तपुरको मध्यपुरथिमि नगरपालिकाको कमेरोटारस्थित कबाडी संकलन केन्द्रमा आगलागी भएको छ । राकेश जैसवाल र सर्बजी जैसवालले सञ्चालन गरेको जस्ताको टहरामा करेन्ट सर्ट भई आगलागी भएको हो ।

आगो नियन्त्रणका निम्ति नेपाल प्रहरीबाट १०, सशस्त्र प्रहरीबाट २९ र नेपाली सेनाबाट २० जनाको टोली खटिएको थियो । टोलीले दिउँसो ३ बजे आगो नियन्त्रणमा लिएको नेपाली सेनाका सहसेनानी भगवान केसीले जानकारी दिए ।

आगलागी नियन्त्रणका लागि जुद्ध वारुणयन्त्र कार्यालय भक्तपुरबाट दुई, नेपाली सेनाको र काठमाडौंबाट समेत दमकल परिचालन गरिएको थियो । आगलागीबाट मानवीय क्षति नभएको र भौतिकतर्फ १५ लाख रुपैयाँबराबरको क्षति भएको जनाइएको छ । रासस