काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले वर्तमान सरकार अलोकतान्त्रिक र भ्रष्ट भएको बताएका छन् ।

शुक्रबार पार्टी केन्द्रीय कार्यालय च्यासलमा बैंक, बिमा तथा वित्तीय क्षेत्र कर्मचारी संघ नेपालको महाधिवेशनलाई सम्बोधन गर्दै उनले यस्तो बताएका हुन् । उनले नेपालमा हेर्दाहेर्दै कस्तो सरकार बन्यो ? भन्दै प्रश्न गरे । 

वर्तमान सरकारले लोकतान्त्रिक पद्धति नै मासेको ओलीको आरोप थियो । वर्तमान सरकार गैरकानुनी र बेथितिबाट चल्ने सरकार भएको टिप्पणी गरे ।

अध्यक्ष ओलीले आजबाट स्काउटको अधिवेशन हुने भनेर सम्पूर्ण तयारी गरिसकेपछि प्रधानमन्त्री पुष्पकमल दाहालले आदेश दिएर अधिवेशन रोकेको आरोप लगाए । सत्ता गठबन्धन हार्ने भएपछि अधिवेशन रोक्न लगाएको बताए । 

ओलीले कुनैपनि स्वतन्त्र संस्थाहरूलाई राम्रोसँग काम गर्न गठबन्धनले नदिएको आरोप लगाए ।