काठमाडौं । नेकपा (एमाले)का अध्यक्ष केपी शर्मा ओलीले देश विकास गर्न प्रतिबद्ध प्रयास चाहिने बताएका छन् ।

मंगलबार ‘संसद्‌मा केपी शर्मा ओली’ नामक पुस्तकको विमोचन कार्यक्रममा उनले देश बनाउनका लागि राष्ट्रिय प्रतिबद्धताको आवश्यकता औंल्याए । 

“वातावरणीय हिसाबले असाध्यै अनुकूल भएका देशहरू पनि बनेका छन् । मरुभूमी जस्ता देश पनि बनेका छन् । हाम्रो देश जसरी पनि बन्न सक्ने देश हो । प्रतिबद्धता मात्रै हुँदाखेरी । हामी बनाउन सक्छौँ । आज पनि हामीलाई राष्ट्रिय आत्मविश्वासको आवश्यकता छ,” ओलीले भने । 

उनले निराशा, आक्रोश, उत्तेजना, दोष अरुमाथि थुपार्ने कुरा गरेर देश नबन्ने बताए । उनले अरु देशमा गएर बनाउन सकिन्छ भने आफ्नै देश बनाउन सकिँदैन भन्ने प्रश्न गरे । ४० प्रतिशत युवा र ६० प्रतिशत सक्रिय जनसंख्या भएको उर्वर रहेको सुनाए ।

“अलिक वर्ष हामी असफल भयौँ । यस्तै भयौँ भने जेष्ठ नागरिकको संख्या बढी भएको, आश्रित भएर खानेको संख्या बढी भएको । उत्पादनभन्दा खपत गर्नेको संख्या बढी हुन्छ,” ओलीले भने । 

उनले विकास नगरे राष्ट्र असफल हुने खतरा रहेको पनि बताए ।