काठमाडौं । काठमाडौं महानगरपालिकाले स्वयम्भू क्षेत्रबाट ६१ मेट्रिक टन फोहोर संकलन गरेको छ । मंसिर २१ गतेदेखि सफाइ थालेको महानगरले स्वयम्भू परिक्रमा मार्ग, सिँढी, जंगल र स्तुप क्षेत्रको सरसफाइबाट ६१ मेट्रिक टन फोहोर संकलन गरेको हो ।

सफाइका क्रममा प्लास्टिक, कपडा, बोतल, सिस, रुखका पात संकलन गरिएको महानगरले जनाएको छ । यसका लागि दैनिक एक सय जना जनशक्ति खटाइएको थियो । 

परिक्रमा मार्गमा भगवान पाउ, किमडोल, बुद्ध पार्क, मसिंगालगायत ठाउँ छन् । स्तुप जानका लागि भगवान पाउबाट उक्लने सिँढी छन् । यससँगै किमडोल र बुद्धपार्कबाट माथि जान सकिन्छ । सफाइका क्रममा मानिसहरूको आवातजावत हुने स्थानहरूलाई विशेष प्राथमिकतामा राखिएको थियो । 

महानगरले सहरी स्वच्छताका लागि सरसफाइका कार्यक्रम सञ्चालन गरिरहेको छ । वातावरण व्यवस्थापन विभागले सरसफाइका लागि जनशक्ति, साधन तथा उपकरण प्रयोग गर्ने गरेको छ । ब्रुमरले सडकको माटो संकलन गर्ने, जेट मेसिनले सडक पखाल्ने गरिन्छ । यसमा महानगर प्रहरी बलले सहयोग गर्ने गरेको छ । यससँगै स्वर्णिम योजनाअन्तर्गत नदी सफाइ र डुबान समाधान योजना सञ्चालनमा रहेको महानगरले जनाएको छ ।