काठमाडौं । चार महिनाअघि पृथ्वीमा आइपुगेको क्षुद्रग्रहको ढुंगामाटोसहित धुलोको सबै नमुना अन्ततः नासाले प्राप्त गरेको छ । अमेरिकाको ह्युस्टनस्थित नासाको जोन्सन स्पेस सेन्टरमा उक्त नमुना संकलित कन्टेनर खोलिएको हो ।

नासाले गत साता ४.६ अर्ब वर्ष पुरानो क्षुद्रग्रह बेन्नुबाट संकलित नमुना पाएको घोषणा गरेको हो । बेन्नु सौर्यमण्डल बन्नेक्रममै निर्मित क्षुद्रग्रह भएको बताइएको छ । सन् २३०० मा यो पृथ्वीसँग ठोक्किन सक्ने सम्भावना रहेको अध्ययनले देखाएको थियो । 

बेन्नुबाट नमुना संकलन गर्ने उद्देश्यले नासाले ओसिरिस–रेक्स मिसन सञ्चालन गरेको थियो ।

सोही मिसनमार्फत संकलन गरिएको बेन्नु क्षुद्रग्रहको चट्टानको धेरैजसो नमुना गत सेप्टेम्बरमा नै नासाले प्राप्त गरेको थियो । नमुना रहेको कन्टेनरबाट निकाल्न बाँकी नमुना पनि अहिले प्राप्त गरेको नासाले जनाएको हो ।

संकलनका लागि अबौँ डलर खर्च भएको यो नमुनाको अध्ययनले पृथ्वी जस्ता ग्रहको उत्पत्ति र यो ग्रह कयौँ किसिमका जीवजन्तु बस्न योग्य कसरी बन्यो भन्नेबारे थप जानकारी दिने विश्वास गरिएको छ ।