काठमाडौं । गैरआवासीय नेपाली संघ अन्तर्राष्ट्रिय समन्वय परिषद् (एनआरएनए)ले नेपाल भलिबल संघलाई आर्थिक सहयोग गरेको छ ।

संघको काठमाडौंको बालुवाटारस्थित मुख्यालयमा एनआरएनए स्पोर्टस एकेडेमीले मंगलबार आयोजना गरेको कार्यक्रमबीच संघका अध्यक्ष डा. बद्री केसीले भलिबल संघका अध्यक्ष जीतेन्द्रबहादुर चन्दलाई सो सहयोग हस्तान्तरण गरेका हुन् ।

नेपालको राष्ट्रिय खेल समेत रहेको भलिबल संघलाई गैरआवासीय नेपाली संघले आठ लाख रुपैयाँ सहयोग गरेको हो ।

कार्यक्रममा भलिबल संघका अध्यक्ष चन्दले एनआरएनएको सहयोगले भलिबल खेलको विकासमा थप योगदान पुग्ने विश्वास व्यक्त गर्दै आगामी दिनमा पनि सहकार्य गर्ने प्रतिबद्धता व्यक्त गरे ।

कार्यक्रममा अध्यक्ष ड. केसीले आठौँ राष्ट्रिय खेलकुद प्रतियोगिताबाट एनआरएनएको टिमले पनि प्रतिस्पर्धा गरेको स्मरण गर्दै नेपालको खेलकुदको विकासका लागि आफूहरूले सधैँ सहयोग गर्ने बताए ।

यसअघि संघले नेपाल क्रिकेट संघ क्यानलाई १० लाख रुपैयाँ सहयोग गरेको थियो ।