काठमाडौं । उपप्रधानमन्त्री तथा गृहमन्त्री नारायणकाजी श्रेष्ठले आधुनिक प्रविधिको दुरूपयोगबाट हुनसक्ने अपराधप्रति सतर्कता अपनाउन जरुरी रहेको बताएका छन् । 

नेपाल प्रहरी प्रधान कार्यालयमा सञ्चालित एक दिवसीय ‘अपराध अनुसन्धान समीक्षा गोष्ठी’को उद्घाटन सत्रमा सम्बोधन गर्दै गृहमन्त्री श्रेष्ठले अपराधप्रति सतर्कता अपनाई नियन्त्रण र अनुसन्धानमा पूर्वतयारी गर्नु आजको अपरिहार्य आवश्यकता रहेको बताए ।

आन्तरिक शान्ति सुरक्षा कायम गर्न र अपराध अनुसन्धान गर्नको लागि नेपाल प्रहरी प्रमुख निकाय भएको उनले बताए । 

गृहमन्त्री श्रेष्ठ भने, “सही अनुसन्धानले अपराधीलाई कानुनको कठघरामा मात्र ल्याउँदैन, हुनसक्ने अपराधलाई रोक्ने र गलत प्रवृति भएका व्यक्तिहरूलाई निरुत्साहित गर्ने कार्य समेत गर्दछ । पीडितलाई न्यायको अनुभव गराउनुमा पनि अपराध अनुसन्धानको प्रमुख भूमिका हुन्छ ।” 

अपराध अनुसन्धान एक बहुआयामिक प्रयास भएको र अनुसन्धान गर्ने निकायको एकल प्रयासले यो महत्त्वपूर्ण कार्यलाई सम्पन्न गर्न कठिन हुने मन्त्री श्रेष्ठले उल्लेख गरे । यसमा अन्य सरकारी निकायहरू, विभिन्न सेवा प्रदायक संस्थाहरू र नागरिकहरू समेतको समन्वय, सहयोग र सहकार्यको आवश्यकता रहनेमा जोड दिए ।

प्रहरीलाई अपराध अनुसन्धानका दौरानमा आउने दबाबको प्रभावमा नपर्न समेत गृहमन्त्री श्रेष्ठले निर्देशन दिए । 

महान्यायाधिवक्ता डा.पोखरेलले अपराध अनुसन्धानलाई त्रुटीरहित, विश्वसनियतता र प्रमाणको आधारमा गर्नु नै अहिलेको आवश्यकता रहेकोमा जोड दिए ।