काठमाडौं । भारतीय प्रधानमन्त्री नरेन्द्र मोदीले लक्षद्वीप टापुको भ्रमण गरेपछि माल्दिभ्ससँगको विवाद चर्किएको छ । माल्दिभ्सका नेता एवं अधिकारीहरूले आफ्नो देशको पर्यटन भारतीय टापु लक्षद्वीपमा तान्न खोजेको आरोप लगाउँदै टिप्प्णी गरेका छन् ।
माल्दिभ्सका तीन उपमन्त्री मलशा शरीफ, मरियम शिउना र अब्दुल्ला महजुम माजिदले सामाजिक सञ्जालमा मोदीलाई ‘आतंकवादी’, ‘जोकर’ र इजरायलको भनेको काम गर्ने भन्ने किसिमका अपमानजनक टिप्पणी गरेका थिए ।
माल्दिभ्सको विदेशमन्त्रालयले ती सरकारी नभएर व्यक्तिगत टिप्पणी भएको भन्दै तीनजनै मन्त्रीलाई निलम्बन गरेको छ ।
यससँगै भारत र माल्दिभ्सबीच तनाव बढेको छ । भारतीय नागरिकहरूले माल्दिभ्स भ्रमणमा नगएर अब लक्षद्वीप जान आह्वान गरिरहेका छन् । कतिपय कम्पनीले माल्दिभ्सको भ्रमण प्याकेज नै हटाएका छन् भने, मानिसहरू माल्दिभ्स जानबाट रोकिन थालेको बताइएको छ ।
विवादकाबीच भारतीय विदेश मन्त्रालयले सोमबार माल्दिभ्सका उच्चायुक्त इब्राहिम साहिबलाई बोलाएको छ ।
तनावकै बीच चीन निकट मानिने माल्दिभ्सका राष्ट्रपति मोहम्मद मुइज्जु पाँचदिने औपचारिक भ्रमणमा चीन गएका छन् ।
लक्षद्वीप भारतको केरलाको तटमा रहेको ३६ टापु मिलेर बनेको द्वीपसमूह हो । त्यहाँको पर्यटन प्रवर्धनका लागि मोदी केही दिनअघि त्यहाँ पुगेका तस्बिरहरू भाइरल भएका थिए । लक्षद्वीपमा रहेका टापु माल्दिभ्सका टापुजस्तै देखिन्छन् ।
द गार्जियनबाट ।
