काठमाडौं । जनमत पार्टीका अध्यक्ष सीके राउतले सरकारले मधेसीहरूलाई रंग विभेद गरेको आरोप लगाएका छन् । राउत सोमबार बिहान माइतीघर मण्डलामा प्रदर्शनका क्रममा पक्राउ परेका थिए । 

प्रहरी हिरासतबाट छुटेपछि सञ्चारकर्मीसँगको कुराकानीका क्रममा उनले आफूहरूले निषेधित क्षेत्र नतोडेको बरु कला परिषद्‌बाटै प्रहरीले आफूहरूलाई धरपकड गरेको बताए ।

उनले मन्त्री र सांसदलाई जुनसुकै बेला पनि समात्ने सरकारले जनतालाई कस्तो स्वतन्त्रता दिएको होला ? भन्दै प्रश्न पनि गरे ।

सरकारले रंगभेदी विभेद गरेको भन्दै उनले यो कुरा संसद् र समितिमा प्रस्तावका रूपमा लैजाने बताए । मधेसी मूलकी मन्त्री भएकै कारण संघीय मामिता तथा सामान्य प्रशासनमन्त्री अनिता देवीलाई पक्राउ गरेको उनको दाबी छ ।

"आजको दिन हामीले धेरै पहिलादेखि धोती दिवस मनाउँदै आएका छौँ । यो दिन देशले राष्ट्रिय पोसाक दिवसका रूपमा मनाउँदै आएको छ । नेपालको संविधान २०७२ ले नेपाललाई बहुजातीय, बहुभाषिक, बहुधार्मिक, बहुसांस्कृतिक राज्यको रूपमा घोषित गरेको छ । जसको जे भेषभूषा हो, त्यो मनाउन पाउनुपर्छ भनेर नै मनाइएको हो," उनले भने ।

उनले थपे, "यहाँ कतिसम्म विभेद छ भने कोही जे बोल्दा पनि पक्राउ नपर्ने, मधेस मूलकी महिला मन्त्री बन्दा प्रहरी र नेपाल सरकारको मानसिकता कस्तो छ भने जतिबेला पनि समात्न पायो भनेर देखिन्छ । नभए कुनै राष्ट्रिय अध्यक्षलाई समातेर देखाउन् त, सकिँदैन नि । यो देशमा कस्तो रंगभेद र विभेद छ भने मधेसी पार्टी त हो नि भनेर समातियो," उनले भने ।