काठमाडौं । नेपाल उद्योग वाणिज्य महासंघ (एफएनसीसीआई)ले उद्योगमा जडित डेडिकेटेड र ट्रंकलाइनको भुक्तानी विवाद टुंगोमा नपुग्दै विद्युत् लाइन काटिएको प्रति ध्यानाकर्षण भएको बताएको छ ।

गत भदौ २५ गते प्रधानमन्त्री पुष्पकमल दाहाल 'प्रचण्ड'ले विद्युत् लाइन नकाट्न निर्देशन दिएको विषयमा विभिन्न निकायमा छलफल चलिरहेपनि लाइन काटिएकोमा महासंघले आपत्ति जनाएको हो ।

“विभिन्न समयमा विभिन्न प्रक्रियाबाट बिजुली उपलब्ध गराइएको र उपभोग भए नभएको विषयमा उद्यमी व्यवसायी र नेपाल विद्युत् प्राधिकरणबीच मत भिन्नता छ । जसले गर्दा धेरै समयदेखि यो विषय अल्झिएको छ,” महासंघले एक विज्ञप्ति जारी गर्दै भनेको छ ।

उद्योगीले निरन्तर विद्युत् महसुल बुझाए पनि तीन वर्षपछि विल आएको महासंघको भनाइ छ । उद्यमी व्यवसायी डेडिकेटेड र ट्रंकलाइनको उपभोगको नियमानुसार (टीओडी मिटरको आधारमा) तिर्नुपर्ने रकम तिर्न तयार रहेको महासंघले विज्ञप्तिमा उल्लेख गरेको छ ।

कानुनसम्मत रूपमा उद्योगले तिर्नुपर्ने भएपनि उद्योगले भुक्तानी गर्नुपर्ने र नतिर्नु पर्ने देखिएमा जबरजस्ती भुक्तानीका लागि बाध्य गर्न नहुने महासंघले जनाएको छ ।

सरकार र निजी क्षेत्र यसबारे पूर्ण जानकार रहेको भन्दै समस्या समाधानका लागि उच्चस्तरिय अधिकार सम्पन्न आयोग स्थापना गनुपर्ने माग महासंघले राखेको छ ।

यस विषयमा अन्तिम टुंगो नलागेसम्म महासंघले विद्युत् लाइन काटिएका उद्योगको लाइन जोड्न र अन्य उद्योगको लाइन नकाटन आग्रह गरेको छ ।