काठमाडौं । माछापुच्छ्रे बैंक, नेपाल इलेक्ट्रोनिक पेमेन्ट सिस्टम्स (नेप्स) र सीटीटेकबीच ‘युनिफाइड मर्चेन्ट म्यानेज्मेन्ट सिस्टम्स (एमएमएस) एकीकृत व्यवस्थापन प्रणाली’ सञ्चालनका लागि त्रिपक्षीय सम्झौता भएको छ ।

सम्झौतापत्रमा नेप्सका प्रमुख कार्यकारी अधिकृत सञ्जिव सुब्बा, सीटीटेकका प्रमुख कार्यकारी अधिकृत साजन शर्मा र माछापुच्छ्रे बैंकका नायब महाप्रबन्धक प्रसिद्ध राज अर्यालले हस्ताक्षर गरेका छन् ।

नेप्स र सीटीटेकको सहकार्यमा विकास गरिएको गेट पे नामक एमएमएस सञ्चालनमा आएपछि हाल छरिएर रहेका विभिन्न भुक्तानी उपकरण र सञ्जाललाई बैंक तथा व्यापारीले एकीकृत रूपमा व्यवस्थापन गर्न सक्ने माछापुच्छ्रे बैंकले जनाएको छ ।

सम्झौताले व्यापारीहरूको हाल भुक्तानी उपकरण तथा सञ्जालसँग छुट्टाछुट्टै रजिस्ट्रेसन तथा व्यवस्थापन गर्नुपर्ने प्रक्रियालाई सरलीकरण गर्ने र एकै प्लेटफर्ममा ती सुविधा उपलब्ध गराउने छ ।

यो प्लेटफर्मबाट कारोबारी र कारोबारसँग सम्बन्धित महत्त्वपूर्ण डाटाको पहुँच र नियन्त्रण बैंक तथा व्यापारीमा पुग्ने, पटक पटक व्यापारीको रजिस्ट्रेसन तथा व्यवस्थापन गर्नुपर्ने झन्झट हट्ने बैंकले जनाएको छ ।