काठमाडौं । प्रमुख प्रतिपक्ष दल नेकपा (एमाले)का सचिव एवं सांसद योगेशकुमार भट्टराईले सरकारले विखण्डनकारी गतिविधिलाई नियन्त्रण गर्न नचाहेको आरोप लगाएका छन् । 

कोसी प्रदेशमा पहिचानवादीको नाममा मुलुकका विखण्डनकारी गतिविधि गर्न लागेकाहरूलाई नियन्त्रण गर्नुको साटो वर्तमान सरकार कानमा तेल हालेर बसेको उनको जिकिर थियो । मंगलबार सञ्चारकर्मीसँग संक्षिप्त कुरा गर्दै सचिव भट्टराईले मुलुकमा देखिएको विखण्डनकारी गतिविधिलाई तत्काल नियन्त्रणमा लिन प्रधानमन्त्री पुष्पकमल दाहाल ‘प्रचण्ड’लाई सचेत गराए । 

उनले कोसी प्रदेशतर्फ संकेत गर्दै एमालेले पहिचानको नाममा विखण्डनकारी गतिविधि गर्नेहरूको प्रतिरोध गर्ने बताए । कोसी प्रदेशको नाम बदल्नुपर्छ भन्नेहरूलाई आफूहरूले सकारात्मक रूपमा लिएको र सोहीअनुसार संवाद गर्ने सचिव भट्टराईको भनाइ थियो । 

सचिव भट्टराईले कोसी प्रदेशमा पनि एमालेको वर्चस्व रहेको कुरा पार्टीको समृद्धिका लागि संकल्प यात्राले पनि पुष्टि गरेको बताए ।