काठमाडौं । अखिल नेपाल फुटबल संघ एन्फाको प्रमुख कार्यकारी अधिकृत (सीईओ)मा इन्द्रमान तुलाधर नियुक्त भएका छन् । 

सोमबार काठमाडौंमा बसेको एन्फा कार्यसमिति बैठकले एन्फाका पूर्वमहासचिव तुलाधरलाई सीईओ नियुक्त गरेको हो ।

तुलाधर तिनै हुन्, जसले पूर्व अध्यक्ष कर्माछिरिङ शेर्पासँगको सहकार्यमा भदौ २५ गते एन्फा अध्यक्ष पंकजविक्रम नेम्वाङ र महासचिव किरण राईको बर्खास्तीको प्रस्ताव दर्ता गराएका थिए । तर, मंसिर ३० गते महासचिव किरण राईसँग संयुक्त पत्रकार सम्मेलनको आयोजना गर्दै तुलाधरले विधानअनुसार सबैलाई समट्ने प्रतिबद्धता नेम्वाङले गरेकाले सहयोग गर्ने बताएका थिए । 

यस्तै, एन्फा बैठकले सहायक कोषाध्यक्षमा प्रविण कुमार यादवलाई नियुक्त गरेको छ । बैठकले एन्फाको विशेष साधारण सभा माघ ८ गते काठमाडौंमा गर्ने निर्णय गरेको छ । नियमित साधारण सभा फागुन १४ गते काठमाडौंमा हुने तय भएको छ ।

एन्फाले भविष्यमा हुने अन्तर्राष्ट्रिय प्रतियोगिता आयोजना गर्दा निःशुल्क पास वितरण पूर्णरूपमा बन्द गर्ने र एन्फाले टिकट बिक्री गरी उठेको रकमको २० प्रतिशत रकम प्रतियोगितामा सहभागी हुने उमेर समूह र राष्ट्रिय महिला तथा पुरुष फुटबल टिमका खेलाडीहरूलाई प्रदान गर्ने निर्णय गरेको छ ।