काठमाडौं । राष्ट्रिय प्रजातन्त्र पार्टी (राप्रपा)को केन्द्रीय कार्यसमितको बैठक जारी छ । धुम्बाराहीस्थित एसआर बैंक्वेटमा बैठक बसेको हो ।

बैठकमा अध्यक्ष राजेन्द्र लिङदेनले समसामयिक राजनीतिक परिस्थिति, रणनीति र भावी कार्यदिशाका विषयमा ‘ब्रिफिङ’ गरेका छन् ।

प्रवक्ता मोहन श्रेष्ठका अनुसार अध्यक्ष लिङदेनले राप्रपाले सशक्त प्रतिपक्षको भूमिका निर्वाह गर्ने बताएका छन् ।

यस्तै, राप्रपा सत्ताकेन्द्रित नभएर आमजनता, शुभेच्छुक, शुभचिन्तकको परिवर्तनको चाहना र देशको अवस्थालाई ध्यान दिइने उनको भनाइ छ ।

लिङदेनले सडकसंघर्षलाई प्राथमिकता दिने पार्टीको कार्यनीति हुने प्रस्ट पारेका छन् । सत्ता र प्रतिपक्ष समेत मिलेमतोमा कमाउ धन्दामा लाग्नु दुर्भाग्यपूर्ण रहेको उनले उल्लेख गरेका छन् ।

राप्रपाको एजेन्डाका पक्षमा जनमत बढ्दै गएको निष्कर्ष उनले बैठकमा पेस गरेका छन् ।

“समान विचार भएकाहरूसँग एकता, सहकार्य आवश्यक र सम्भव पनि छ । आ–आफ्नो सांगठनिक तागतमा चारैतिरबाट आन्दोलन र जनदबाब सिर्जना गरौँ । राप्रपाबारे भ्रम सिर्जना गर्ने, राप्रपा नेतृत्वलाई योजनाबद्ध रूपमा बदनाम गर्ने काम भने रोकिनुपर्छ,” उनले बैठकमा भने ।

बैठकमा महामन्त्री धवलशमशेर राणाले बृहत् आन्दोलनसम्बन्धी कार्ययोजना, कोषाध्यक्ष नीलकण्ठ काफ्लेले आर्थिक प्रतिवेदन, सचिवालयका मुख्यसचिव केदारबहादुर अधिकारीले सचिवालयसम्बन्धी प्रतिवेदन पेस गरेका छन् ।

अहिले प्रदेश प्रमुखहरूले आ–आफ्नो प्रदेशको प्रतिवेदन पेस गरिरहेका श्रेष्ठले जानकारी दिए । सबै प्रदेशको प्रतिवेदन पेस भइसकेपछि आजै छलफल सुरु हुने उनले बताए ।