विराटनगर । “बिहान एकाएक अस्पताल त खाली भएछ भनेर खबर आएपछि हामी सबै हतारिएर हेर्न गयौँ । रातबिरात अरूको सुरक्षा गर्ने प्रहरीले आफ्नै अस्पताल नगरबासी निदाएका बेला मध्यरातमा सारेर लगेछन्,” मोरङ बेलबारी नगरपालिकाकी उपमेयर नितु थापा कोइरालाले भनिन् ।

बेलबारी नगरपालिका–३ मा नेपाल प्रहरीले सञ्चालन गरेको कोसी प्रदेशस्तरीय अस्पताल रातारात सारेर सुनसरीको इनरुवा सारिएपछि उपमेयर थापाजस्तै धेरै नगरबासी बिलखबन्दमा परेका छन् । के कति कारणले नगरबासी निदाएका बेला मध्यरातमा अस्पतालका झिटीगुन्टा इनरुवा पुर्‍याइयो भन्दै प्रश्न गरिरहेका छन् । स्थानीयसहित राजनीतिकर्मी, जनप्रतिनिधि र सरोकारवालाले अस्पताल साविककै स्थानमा पुनःस्थापित गराउन माग गर्दै प्रदेश सरकारको ध्यानाकर्षण गराएका छन् । 

नेपाल प्रहरीको व्यवस्थापनमा बेलबारी सञ्चालित अस्पताल एक्कासि सारिएपछि मंगलबार साँझ त्यस क्षेत्रका प्रदेश सभा सदस्य ज्ञानेन्द्र सुवेदी, मानबहादुर लिम्बू, गीता तिम्सिना, उपमेयर थापा र स्थानीय राजनीतिकर्मीको टोलीले मुख्यमन्त्री केदार कार्कीलाई ज्ञापनपत्र बुझाएका छन् । अस्पताल साविककै स्थानमा कायम गराउन पहल लिइदिन ध्यानाकर्षण गरेको सांसद सुवेदीले बताए ।

“रातको समयमा सरसामान लगिएपछि हामी सबै छक्क परेका छौँ । केही विषय भए छलफल गर्दा हामी निकास निकाल्ने थियौँ । तर, त्यस्तो केही भएन,” उनले भने ।

अस्पताल सारिएको बारे ज्ञापनपत्र दिएर मुख्यमन्त्री केदार कार्कीको ध्यानाकर्षण गर्दै बेलाबारीकी उपमेयर र सांसदहरू ।

२०७९ फागुन ११ गते तत्कालीन प्रहरी महानिरीक्षक धिरजप्रताप सिंहले बेलबारीमा प्रादेशिक प्रहरी अस्पताल उद्घाटन गरेका थिए । खासमा त्यसबेला ट्रमा सेन्टरको रूपमा अस्पताल सञ्चालन गर्ने तयारीसाथ राजमार्गसँगै खोलिएको सिंहले बताएका थिए । इलाका प्रहरी कार्यालय बेलबारी नयाँ भवनमा सरेपछि राजमार्गसँगै रहेको प्रहरी भवनमा अस्पताल सञ्चालन गरिएको थियो ।

तर, सञ्चालनको एक वर्ष पनि नपुग्दै सुनसरी जिल्ला समन्वय समितिको भवनमा अस्पताल सारिएको छ ।

उपमेयर थापाले यसअघि नगरपालिकाले एसी जडान गर्नेदेखि अन्य सहयोग समेत गरेको बताइन् ।

“यसपटक अस्पतालको संरचनादेखि अन्य सुधारका लागि सहयोग होस् भनेर रातो किताबमै उल्लेख गरी १० लाख रुपैयाँ बजेटसमेत विनियोजन गरेका थियौँ,” थापाले भनिन् । 

अस्पतालले जग्गा उपलब्ध गराउन स्थानीय सरकारसमक्ष प्रस्ताव गरेको थियो ।  त्यसबारे छलफल गरी पूर्वनगर प्रमुख तथा वर्तमान कोसी प्रदेश सभा सदस्य ज्ञानेन्द्र सुवेदीले आफ्नै दुई बिघा जग्गा दिने सहमति जनाएका थिए ।

यसबारे सुवेदीले भने, “मैले आफ्नै जग्गा दिने भनेको हुँ । त्यो नभए अहिले नगरपालिकाले निर्माण गरिरहेको नगर अस्पतालमै प्रहरी अस्तपाल सञ्चालन गर्न प्रस्तावसमेत गरिएको थियो । तर उहाँहरूले सल्लाह नै नगरी रातारात भाग्नुभएछ ।”

बारे कोसी प्रदेश प्रहरी कार्यालय प्रमुख डीआईजी राजेशनाथ बास्तोलासँग बुझ्दा केन्द्रीय कार्यालयबाट निर्देशन भएबमोजिम नै अस्पताल सारिएको जवाफ पाएको सांसद सुवेदीले सुनाए । 

स्थानीय दिनेश गिरीले आफूहरूले यसबारे मुख्यमन्त्री केदार कार्कीलाई समस्या राखेको र सरकारले अस्पताल सारिएको विषयमा छलफल गर्ने आश्वासन दिएको बताए ।“बेलबारीमा अस्पतालको आवश्यकताबारे हामीहरूले भन्नुपर्दैन किनभने जनताले लामो समयदेखि माग गरिरहेको विषय हो । तर, भएकै अस्पताल समेत सरेर जाँदा हामीलाई समस्या भएको छ,” उनले भने ।

मुख्यमन्त्रीले यसबारे प्रहरीको माथिल्लो निकायसँग समेत छलफल गर्ने बताएको गिरीले सुनाए । इनरुवा नगरपालिकाका पूर्वमेयर राजन मेहताले पहिले पनि अस्पताल आफ्नो ठाउँमा स्थापना गर्न खोजेको र यसपटक उनकै जोडबलमा अस्पताल सारिएको भन्ने खुल्न आएको गिरी बताउँछन् ।

उनले भने, “अहिले उता दुई बिघा तीन कठ्ठा जग्गासमेत उपलब्ध गराएर अस्पताल सारिएको भन्ने सुनिएको छ ।”

प्रहरीले बेलबारीमा भएको संरचनास्थल साँघुरो भएको भनी पहिले पनि गुनासो गर्ने गरेको गिरीले सुनाए ।