काठमाडौं । उपप्रधान एवं गृहमन्त्री नारायणकाजी श्रेष्ठले जाजरकोट र रुकुम पश्चिमका भूकम्प प्रभावितलाई अस्थायी आवास निर्माणका निम्ति दोस्रो किस्ताको रकम दिन ढिलाइ नगरिने बताएका छन् ।

राष्ट्रियसभाअन्तर्गतको राष्ट्रिय सरोकार तथा समन्वय समितिको बैठकमा बिहीबार उनले भूकम्प प्रभावितलाई अस्थायी आवास निर्माणका निम्ति दिइने ५० हजार रुपैयाँमध्ये पहिलो किस्तामा नगदै २५ हजार दिइने जानकारी गराए ।

पहिलो किस्ता बुझेर आवास निर्माणको काम सुरु गर्नासाथ बाँकी २५ हजार रुपैयाँ बैंकमार्फत दिइने उनले बताए । दोस्रो किस्ता दिन कुनै ढिलाइ नगरिने उनले स्पष्ट पारे ।

दुई किस्तामा दिइने भए पनि समयको ‘ग्याप’ धेरै नहुने भएकाले एकै किस्ता दिएजसरी नै रकम प्रदान गरिने उनले उल्लेख गरे ।

गृहमन्त्री श्रेष्ठले अस्थायी आवास निर्माणका निम्ति मात्र पाँच अर्ब रुपैयाँ चाहिने बताए । 

बैठकमा गृह मन्त्रालयका सचिव दिनेश भट्टराईले जाजरकोटमा टेन्ट एक हजार ६३४, त्रिपाल ४१ हजार ४०२, ब्ल्यांकेट ३१ हजार ६५४, म्याट्रेस १३ हजार ४९२ र स्लिपिङ ब्याग दुई हजार ४८५ वटा पठाइएको जानकारी दिए ।

यस्तै, रुकुम पश्चिममा टेन्ट ८०३, त्रिपाल २२ हजार २५०, ब्ल्यांकेट ६ हजार १७, पी फम पाँच हजार २०१ र स्लिपिङ ब्याग एक हजार ३१४ वटा पठाइएको बताए ।

हालसम्म आवास निर्माणका निम्ति जाजरकोटमा ५५ करोड, रुकुम पश्चिममा ५५ करोड, बझाङमा २५ करोड, बाजुरामा १४ करोड र सल्यानमा दुई करोड गरी जम्मा एक अर्ब ५१ करोड रुपैयाँ पठाइएको उनले जानकारी दिए ।

गएको कात्तिक १७ गते जाजरकोटको रामीडाँडा केन्द्रविन्दु भएर ६.४ म्याग्निच्युडको भूकम्प गएको थियो । सो भूकम्पमा परी जाजरकोट र रुकुम पश्चिममा गरी कुल १५४ जनाको मृत्यु र ३६६ जना घाइते भएका उनले बताए ।

जाजरकोटमा पूर्ण क्षति भएका घरको संख्या नौ हजार ७९४ र २४ हजार घरमा आंशिक क्षति भएको सचिव भट्टराईले जानकारी दिए ।

रुकुम पश्चिममा १६ हजार ५७० घर पूर्ण र नौ हजार ९६१ घरमा आंशिक क्षति भएको जनाइएको छ । यस्तै, रुकुम पश्चिममा १६ सार्वजनिक भवन पूर्ण र २१ वटामा आंशिक क्षति भएको जनाइएको छ ।

रुकुम पूर्वमा १५०, सल्यानमा ६०० बढी, रोल्पामा १०० बढी र प्युठानमा ३१ घरमा क्षति भएको उनले बताए ।