काठमाडौं । नेपाल सुपर लिग (एनएसएल) को दोस्रो संस्करणमा ललितपुर सिटी एफसी र पोखरा थन्डर्सले गोलरहित बराबरी खेल्दै अंक बाँडेका छन् ।

त्रिपुरेश्वरस्थित दशरथ रंगशालामा सम्पन्न खेलमा दुवै टिमले केही अवसर सिर्जना गरे पनि सदुपयोग गर्न नसक्दा अंक बाँडेका हुन् ।

खेलको छैटौँ मिनेटमा मोसेस त्वमको प्रहार पोस्टमा लागेर फर्किंदा पोखराले अग्रता बनाउने सुनौलो अवसर गुमायो । राइट साइडबाट फ्रयांकलिन टल्लाले निकालेको पासमा ‘फर्स्ट टच’ भली प्रहार गरे पनि सेकेन्ड बारमा लागेर फर्किएको थियो । 

३३औँ मिनेटमा कप्तान अनन्त तामाङको हेडर पोखराका गोलकिपर गुएमी प्रिसो जान्गाले पन्च गर्दै गोलको सम्भावना टारे । अनिल महर्जनको कर्नरलाई अनन्तले हेडमार्फत पोस्टको दिशा दिन खोजे पनि जान्गाले त्यो सम्भावना टारेका हुन् ।

४४औँ मिनेटमा पोखराका त्वमको हेडरले पोस्टको दिशा लिन सकेन । राइट साइडबाट आयुश घलानले गरेको क्रसमा त्वमको हेडर पोसट नजिकैबाट बाहिरिएको थियो ।

०औँ मिनेटमा पोखराका आयुशले १ यार्ड बक्सभित्रबाट गरेको प्रहार ललितपुरका गोलकिपर जेफ्री मार्सेलले सहजै जोगाए ।

८२औँ मिनेटमा पोखराका जोए आएडुले करिब २२ यार्ड परबाट गरेको प्रहार बारमाथिबाट बाहिरिँदा ललितपुरको खतरा टरेको थियो ।

प्रतियोगितामा दुवै टिमको यो दोस्रो खेल हो । यसअघि प्रतियोगिताको पहिलो खेलमा ललितपुरले बुटवल लुम्बिनी एफसविरुद्ध २–० को जित निकालेको थियो । पोखराले पहिलो खेलमा एफसी चितवनलाई १–० ले हराएको थियो । 

बराबरीसँगै प्रतियोगितामा दुई खेलबाट समान चार अंक जोडेको ललितपुर शीर्ष स्थानमा उक्लिँदा पोखरा तेस्रो स्थानमा छ ।

तस्बिरहरू : हरिशजंग क्षेत्री/बाह्रखरी