काठमाडौं । साविक विजेता काठमाडौं रेजर्स र चितवन एफसीले नेपाल सुपर लिग (एनएसएल)को दोस्रो संस्करणमा १–१ को बराबरी खेल्दै अंक बाँडेका छन् ।
त्रिपुरेश्वरस्थित दशरथ रंगशालामा अन्तिम १० मिनेट रोमाञ्चक बनेको खेलमा चितवनका विमल घर्ती मगरले र काठमाडौंका एन्कुंगे जुनियरले गोल गरे ।
पोसेसन र मिडफिल्डमा नियन्त्रणका लागि दुवै टिमले चर्को प्रतिस्पर्धा गरे पनि गोलका लागि भने अन्तिम समय कुर्नपरेको खेलमा विमलले ८६औँ मिनेटमा गोल गर्दै चितवनलाई अग्रतामा राखेका थिए । विमलले ६ यार्ड बक्सको लेफ्ट साइडबाट गरेको प्रहार काठमाडौंका टोजिडिनोभ कोमिओनलाई लाग्दै गोल भएको थियो ।
तर, चितवनको यो अग्रता लामो समय टिक्न सकेन । इन्जुरी समयमा एन्कुंगे जुनियरले गोल गरेपछि साविक विजेता खेलमा फर्किएको थियो ।
अग्रता जोगाउन नसक्दा अंक बाँडेको चितवनका लागि यो प्रतियोगिताको पहिलो अंक हो । चितवन यसअघि पहिलो खेलमा पोखरा थन्डर्ससँग १–० ले पराजित भएको थियो । यता, काठमाडौंले भने पहिलो खेलमा स्पोर्टिङ इलाम डे मेची एफसीलाई १–० ले हराएको थियो ।
बराबरीसँगै दुई खेलबाट चार अंक जोडेको काठमाडौं तालिकाको शीर्ष स्थानमा उक्लिएको छ । समान खेलबाट एक अंक जोडेको चितवन तालिकाको छैटौं स्थानम उक्लिएको छ ।
खेलमा दुवै टिमले अन्य केही अवसर बनाए पनि सदुपयोग गर्न सकेनन् । १४औँ मिनेटमा काठमाडौंका टोजिडिनोभ कोमिवोनको प्रहार चितवनका गोलकिपर विशाल श्रेष्ठले सजिलै बचाए ।
२३औं मिनेटमा काठमाडौंका शोखरुखको फितलो प्रहार बाहिरियो । त्यसको तीन मिनेटपछि रक्षक टेक राज बुढाथोकीको क्रसमा फरवार्ड रोशन राणा मगरको फितलो प्रहार बाहिरिँदा चितवन अग्रता लिनबाट बन्चित भयो ।
निर्धारित हाफ सकिन तीन मिनेट बाँकी छ्रँदा आइकोनिक खेलाडी विमल घर्तीमगरको शक्तिशाली प्रहार बाहिरिन पुग्दा काठमाडौंको खतरा टरेको थियो ।
७३औँ मिनेटमा चितवनका विमलको प्रहार फ्रेममा रहन सकेन । अफ्रिइ अक्वाहले १८ यार्ड बक्सको राइट साइडमा निकालेको बललाई पहिलो टचमै प्रहार गरे पनि ‘सेकेन्ड बार’ नजिकबाट बाहिरियो ।
प्रतियोगितामा दुबै टिमको यो दोस्रा खेल हो । यसअघि काठमाडौंले प्रतियोगिताको उद्घाटन खेलमा स्पोर्टिङ इलाम डे मेची एफसीलाई १–० ले हराएको थियो । चितवन भने पोखरा थन्डर्ससँग १–० ले पराजित भएको थियो ।
