काठमाडौं । साहित्यकार सूर्यप्रसाद लाकोजूको ‘पनौतीका केही जात्रापर्वहरू’को दोस्रो संस्करण हालै सार्वजनिक गरिएको छ । 

पनौतीमा आयोजित समारोहबीच इतिहासकार प्रा.डा. पुरुषोत्तमलोचन श्रेष्ठ, पनौती नगरपालिकाका नगरप्रमुख रामशरण भण्डारी, निवर्तमान नगर प्रमुख भीम न्यौपानेलगायतले उक्त पुस्तक सार्वजनिक गरे ।

कार्यक्रममा डा. श्रेष्ठले नेपालको इतिहास लेख्दा पनौतीको इतिहास लेखिएन भने अपुरो हुने बताए । 

पनौती नगरपालिकाका प्रमुख रामशरण भण्डारीले पनौतीलाई चिनाउने काम लेखकले गर्दै आएको चर्चा गरे । 

यस पुस्तकमा पनौतीको परिचय, ऐतिहासिक पृष्ठभूमि, पनौतीमा वर्षभरिमा मनाइने जात्रा पर्वहरू, केही नाचहरूका विषयमा लेखिएको छ ।