काठमाडौं । नेपाल जग्गा तथा आवास विकास संघको आयोजनामा ‘आठौँ रियल इस्टेट एक्स्पो, २०२३’ हुने भएको छ । एक्स्पो आउँदो पुस १२ देखि १५ गतेसम्म काठमाडौंको भृकुटीमण्डपमा आयोजना गरिँदै छ ।

करिब एक लाखभन्दा बढीले एक्स्पोको अवलोकन गर्ने संघको अपेक्षा छ । एक्स्पो रियल इस्टेट क्षेत्रका विकासकर्ता र उपभोक्ताबीच एकैस्थलको भेटघाट विन्दु हुने आयोजकले जनाएको छ ।

एक्स्पोमा विकासकर्ताले आफ्ना नयाँ उत्पादन प्रदर्शन गर्ने र उपभोक्ताले नेपालको आवास तथा जग्गा विकाससम्बन्धी समग्र पक्षबारे जानकारी पाउने संघले विश्वास लिएको छ ।

एक्स्पोमा व्यावसायिक र व्यापारिक सम्पत्ति, वास्तुकला, निर्माण, भवन, इन्जिनियरिङ, बैंकिङ र बिमा कम्पनीसहित राष्ट्रिय र अन्तर्राष्ट्रिय प्रदर्शकको सहभागिता रहने संघले जनाएको छ ।

एक्स्पोमा अपार्टमेन्ट र टाउन हाउस कम्प्लेक्स, घडेरी जग्गा, बत्ती तथा विद्युतीय फिक्स्चर, फर्निचर र फर्निसिङ, सिरेमिक, फोहोर व्यवस्थापन, घरजग्गा एजेन्ट, निर्माण सामग्री आपूर्तिकर्ता र वितरक, निर्माण उपकरण तथा सेवाका स्टल राखिनेछ ।

संघका अध्यक्ष विदुर धमलाले एक्स्पोले अर्थतन्त्रलाई चलायमान बनाउन सहयोग पुग्ने बताए ।

जग्गा तथा आवास विकास महासंघका अध्यक्ष भेषराज लोहनीले काठमाडौंसँगै बाहिर पनि विस्तारै एक्स्पो आयोजना गर्दै जाने बताए । हाल काठमाडौंबाहिर अनौपचारिक कारोबार हुने भएकाले एक्स्पो गर्न सहज नभएको लोहनीले उल्लेख गरे ।

अर्का व्यवसायी दीपक मल्होत्राले घरजग्गा कारोबारमा मन्दी देखा पर्दा सबै क्षेत्रमा असर परेको बताए ।

संघका पूर्वअध्यक्ष मीनराज श्रेष्ठले एक्स्पोमा नयाँ उत्पादन राखिने बताए ।