काठमाडौं । आईसीसी ट्वान्टी–२० विश्वकप एसिया छनोटको सेमिफाइनलमा युनाइटेड अरब इमिरेट्स (यूएई)विरुद्ध नेपालका अलराउन्डर दीपेन्द्रसिंह ऐरी फर्किने सम्भावना उच्च देखिएको छ ।

प्रतियोगिताको पहिलो खेलमा नेपालले सोमबार सिंगापुरसँग खेल्नुअघि नेपाली टिमका अलराउन्डर ऐरीको बायाँ खुट्टामा चोट लागेको थियो । सोही कारण उनले समूह चरणको दोस्रो र तेस्रो खेल गुमाएका थिए ।

नेपाल क्रिकेट संघ (क्यान) स्रोतका अनुसार प्रशिक्षक मोन्टी देसाई पनि दीपेन्द्रलाई सेमिफाइनलमा फर्काउनेमा सकारात्मक छन् । प्रतियोगिताको डाक्टर अभिषेकराज सिंहले पनि दीपेन्द्रलाई शुक्रबार हुने खेलका लागि फर्काउने प्रयास भइरहेको बताए ।

“इन्जुरीको प्रोग्रेस सकारात्मक छ । दीपेन्द्रको इन्जुरीसँग सम्बन्धित हाडजोर्नी विशेषज्ञसँग छलफल भइरहेको छ । खेलाउन सकिने अवस्था रहेकाले टिमसँगको छलफलपछि सकेसम्म भोलि मैदान फर्काउने प्रयासमा छौँ,” डा सिंहले बाह्रखरीसँग भने ।

नेपालले भोलि (शुक्रबार) यूएईसँग मूलापानीस्थित माथिल्लो मूलपानी मैदानमा खेल्ने तालिका छ । खेल बिहान ११ बजेदेखि सुरु हुनेछ । यो खेलमा जित निकाल्ने टिमले प्रतियोगिताको फाइनलसँगै आगामी वर्ष अमेरिका र वेस्ट इन्डिजमा हुने विश्वकपमा स्थान बनाउनेछ ।