काठमाडौं । ओमानसँगको हारपछि नेपाली क्रिकेट टोलीका प्रशिक्षक मोन्टी देसाईले जारी आईसीसी ट्वान्टी–२० विश्वकप छनोटको एसिया क्वालिफायरमा दीपेन्द्रसिंह ऐरीलाई खेलमा फर्काउन सबै प्रयास भइरहेको बताएका छन् । खेलपछि पत्रकार सम्मेलनमा प्रशिक्षक चोटग्रस्त अलराउन्डर दीपेन्द्रलाई टोलीमा फर्काउन धेरै प्रयास भइरहेको बताए । 

सिंगापुरसँगको पहिलो खेल सुरु हुन लाग्दा अभ्यासका क्रममा घाइते भएका दीपेन्द्रले जारी प्रतियोगिता खेल्न पाएका छैनन् ।

दीपेन्द्रले समूह ‘ए’ को अन्तिम खेलमा नेपालले ओमानसँग खेलिरहँदा पनि त्रिवि मैदानभित्र रहेको नेटमा अभ्यास गरिरहेका थिए । त्यसैले दीपेन्द्रसिंह टोलीमा फर्कने सम्भावनाबारे प्रश्न गर्दा प्रशिक्षक देसाईले उनको करियरका लागि धेरै प्रयास भइरहेको बताए । प्रशिक्षक देसाईले अहिले नै दीपेन्द्र खेल्न सक्छ भन्ने अवस्थामा भने नरहेको स्पष्ट पारे ।

प्रशिक्षक देसाईले हरेक दिन नयाँ प्रतिभा खोज्ने आशा रहने गरेको र आज विवेकको प्रदर्शनले आफूलाई धेरै मनोरञ्जन पनि लिएको धारणा दिए ।

उनले आज लक्ष्य भेटाउन सक्ने खालको भए पनि सफल हुन नसकेको उल्लेख गर्दै विपक्षको बलिङ पनि राम्रो रहेको बताए । उनले यूएईसँगको सेमिफाइनलमा एकपटक फेरि धैर्यता राख्दै राम्रो खेल्ने उल्लेख गर्दै आफ्नो टोलीप्रति पूर्ण विश्वास रहेको पनि बताए ।