काठमाडौं । श्रीलंकामा जारी सेन्ट्रल एसियन भलिबल एसोसिएसन (काभा) पुरुष भलिबल च्यालेन्ज कपमा नेपालले दोस्रो हार बेहोरेको छ । शुक्रबार कोलम्बोस्थित सुगाथादास इन्डोर रंगशालामा सम्पन्न आफ्नो चौथो खेलमा नेपाल साउदी अरेबियासँग ३–२ को सेटमा पराजित भएको हो ।
खेलको पहिलो सेट २२–२५ ले गुमाएको नेपालले दोस्रो सेट २५–२१ ले आफ्नो पक्षमा पारेको थियो ।
तेस्रो सेट २३–२५ ले गुमाउँदा निकै रोमाञ्चक बनेको चौथो सेट २७–२५ ले जित्दै नेपालले खेल पाँचौँ सेटसम्म पुर्याएको थियो । पाँचौँ तथा निर्णायक सेट भने नेपालले १६–१४ ले गुमायो ।
नेपालको यो दोस्रो हार हो । यसअघि बंगालादेशलाई ३–१ र अफगानिस्तानलाई ३–२ को सेटमा हराएको नेपाल श्रीलंकासँग ३–० को सोझो सेटमा स्तब्ध बनेको थियो ।
यता साउदी अरेबियाको भने पहिलो जित हो । यसअघि साउदी अरेबिया श्रीलंका र उज्वेकिस्तानसँग समान ३–० र बंगालदेशसँग ३–२ को सेटमा पराजित भएको थियो ।
अब नेपालले लिग चरणको अन्तिम खेलमा शनिबार उज्वेकिस्तानको सामना गर्ने छ ।
अक्टोबर १५ सम्म हुने प्रतियोगितामा नेपालसहित बंगलादेश, श्रीलंका, अफगानिस्तान, साउदी अरेबिया, उज्वेकिस्तान सहभागी छन् ।