काठमाडौं । इङ्लिस प्रिमियर लिग २०२३–२४ को उपाधि मानचेस्टर सिटीले जितेको छ ।

लिगको अन्तिम दिन सिटीले वेस्ट हमविरुद्ध ३–१ को जित निकालेपछि सिटी लगातार चौथोपटक प्रिमियर लिग च्याम्पियन बनेको हो ।

अन्तिम खेलमा सिटीलाई जित दिलाउन फिल फोडेनले दुई र रोद्रीले गोल गरे । वेस्ट हमका मोहम्मद कुदुसले गोल गरे ।

जितसँगै लिग लिडर सिटीले ३८ खेलबाट ९१ अंक जोड्दै सिजनको अन्त्य गर्‍यो । अन्तिम खेलसम्म उपाधि होडमा कायम रहेको आर्सनलले ८७ अंकसहित सिजनको अन्त्य गर्‍यो ।

आर्सनल च्याम्पियन बन्न अन्तिम खेलमा जित निकाल्दा सिटीले हार्नुपर्ने समीकरण थियो । तर, आर्सनल एभर्टनविरुद्ध २–१ को जित निकाले पनि दोस्रो स्थानमा चित्त बुझाएको हो ।