काठमाडौं । नेपाल उद्योग परिसंघका कार्यवहाक अध्यक्ष वीरेन्द्रराज पाण्डेले नियन्त्रणमुखी राज्यको नीतिले उद्योगी व्यवसायीलाई समस्या परेको बताएका छन् । 

बिहीबार नेपाल उद्योग वाणिज्य महासंघले आयोजना गरेको ‘राष्ट्रिय आर्थिक बहस–सुधारका लागि सहकार्य’ कार्यक्रममा बोल्दै यसमा सुधार गर्नुपर्ने आवश्यकता रहेको बताएका हुन् ।

अहिले बजारमा व्यवसायी तथा उपभोक्ताले खर्चमा कटौती गरिरहेकोले बजारमा पैसा नगएको उनको भनाइ छ ।

“हामीले अर्थतन्त्रमा भएको समस्या समाधान तथा सुधार गर्न सरकारलाई सुझाव दिएका थियौं । तर, हाम्रो सुझाव सुनुवाइ भएन । अहिले हाम्रो अर्थतन्त्रमा शिथिलता, मन्दीदेखि डिप्रेसनको अवस्थामा छ,” उनले भने, “बजारमा अहिले पैसा गएको छैन । यसरी अर्थतन्त्र चलायमान हुन सक्दैन । घरपरिवारले अतिआवश्यकभन्दा बढी खर्च नगरेको अवस्था छ । सरकारले केही निर्णय नलिए अर्थतन्त्र छोटो समयमा नै डिप डिप्रेसनमा जाने चिन्ता छ ।”

विदेशी ऋण दाताको नीति नियम यो समयमा लागु गर्न नहुने उनले बताए । बैंकमा पैसा भए पनि ब्याजदर महँगो भएर लिन सक्ने अवस्था नभएको उनले बताए ।

आन्तरिक उत्पादनलाई सरकराले प्राथमिकता दिनुपर्ने उनले बताए । राजनीतिक मुद्दामा भन्दा आर्थिक मुद्दालाई अहिले नेतृत्व केन्द्रित भएको पनि उनले बताए ।