काठमाडौं । नेकपा (एमाले)का नेता भीम रावलले पार्टी सुदूरपश्चिम अधिवेशनमा निम्ता पाएनन् । असोज २१ गते धनगढीमा अध्यक्ष केपी शर्मा ओलीले अधिवेशनको उद्घाटन गर्दा रावल पनि धनगढीमै थिए । तर, निम्ता नपाउँदा उनी सहभागी भएनन् ।

अधिवेशनमा उनी सहभागी नभए पनि सुरुवातमा रावल पक्षले अध्यक्षका उमेदवार कमल तिमिल्सिनलाई साथ दिएको थियो । तर, अछामका तिमिल्सिनाले स्थायी कमिटी सदस्य कर्ण थापाले साथ दिएका कृष्णप्रसाद जैसीको नाममा सहमति जनाउन सकारात्मक देखिए । उनी सकारात्मक देखिएपछि उमेदवारी दर्ता गर्दा रावल पक्षले भरत साउदलाई अध्यक्षको उमेदवारको रूपमा अघि सार्‍यो ।

एमाले सचिव लेखराज भट्टले अघि बढाएका वचनबहादुर सिंह र तिमिल्सिनाले उमेदवारी फिर्ता लिँदा पनि साउद उमेदवारी फिर्ता लिन तयार भएनन् । पाँच पदाधिकारीमध्ये दुई पद आफूहरूलाई चाहिने अडान रावल पक्षको थियो । 

आज बिहान मात्रै बाह्रखरीसँगको कुराकानीमा साउदले दुई उपसचिव पाए आफू उमेदवारी फिर्ता लिने बताएका थिए । 

अन्ततः रावल समूहका भागरथी विष्ट र नरबहादुर विक उपसचिव बनेका छन् । रावल पक्षले दुई पदाधिकारी पाउँदा एमाले सुदूरपश्चिमका पाँचै पदाधिकारी सर्वसम्मत भएका छन् ।