काठमाडौं । काभा पुरुष भलिबल च्यालेन्जकप–२०२३ को प्रतिस्पर्धात्मक खेलमा नेपालले अफगानिस्तानलाई ३–२ को सेटमा पराजित गरेको छ ।

बुधबार श्रीलंकाको कोलम्बोस्थित सुगाथादसा इन्डोर रंगशालामा सम्पन्न खेलमा नेपालले पहिलो सेट २५–१९ ले जितेको थियो । तर, यसपछि लगातार दुई सेट गुमाउँदा नेपाल पराजयको संघारमा पुगेको थियो । तर, त्यसपछि उत्कृष्ट पुनरागमन गर्दै नेपालले अफगानिस्तानलाई ३–२ को रोमाञ्चक सेटमा हराएको हो । 

नेपालले दोस्रो र तेस्रो सेट क्रमशः १९–२५, २२–२५ ले गुमाएको थियो । तर, त्यसपछि चौथो सेट नेपालले २५–२१ ले जित्यो । पाँचौँ तथा अन्तिम सेट नेपालले १५–१० ले जित्दै नतिजा आफ्नो पक्षमा ल्याएको हो ।

प्रतियोगितामा तेस्रो खेल खेलेको नेपालको यो दोस्रो जित हो । नेपालले यसअघि पहिलो खेलमा बंगलादेशलाई ३–१ को सेटमा हराउँदा दोस्रो खेलमा भने घरेलु टिम श्रीलंकासँग सोझो सेटमा पराजित भएको थियो ।

अफगानिस्तानको भने यो पहिलो हार हो । यसअघिका दुई खेलमा अफगानिस्तानले पहिलो खेलमा उज्वेकिस्तानलाई ३–२ को सेटमा र दोस्रो खेलमा बंगलादेशलाई सोझो सेटमा हराएको थियो ।

श्रीलंकामा जारी प्रतियोगिताको दोस्रो संस्करणमा नेपाल र अफगानिस्तानसँगै साउदी अरेबिया, उज्वेकिस्तान, बंगलादेश र घरेलु टिम श्रीलंकाले प्रतिस्पर्धा गरिरहेका छन् ।