काठमाडौं । चीनले पहिलो ह्युमनोइड रोबोट फुटबल लिगको बेइजिङमा आयोजना गरेको छ । 

चीनको पुरुष फुटबल टोलीले पछिल्ला वर्षहरूमा खासै उत्साह नजगाए पनि, बेइजिङमा ह्युमनोइड रोबोट टोलीहरूले एआई प्रविधिको आधारमा प्रशंसकहरूको मन जितेका छन् । 

यद्यपि, यो सफलता खेलकुद कौशलभन्दा प्रविधिको विकासका कारण सम्भव भएको एसोसिएटेड प्रेसले जनाएको छ ।  यो प्रतियोगिता सामान्य फुटबलभन्दा निकै  नोरञ्जनात्मक भएको टिप्पणी गरिएको छ ।  

प्रतियोगिताका लागि बूस्टर रोबोटिक्सद्वारा निर्मित एआई सञ्चालित रोबोटहरूसँग ५ देखि ६ वर्षका बालबालिकाको सीप स्तर बराबरको क्षमता रहेको बताइएको थियो । रोबोटहरू लड्दा मैदानबाट स्ट्रेचरमा बोकेर बाहिर लगिएको दृश्य पनि देखियो ।  

शनिबार राति, चीनको राजधानी बेइजिङमा चार ह्युमनोइड रोबोट टोलीहरूले पूर्ण रूपमा एआई(संचालित ३–३ फुटबल खेलहरूमा प्रतिस्पर्धा गरे ।  बेइजिङमा भएको रोबो लिग फुटबल प्रतियोगितामा ह्युमनोइड रोबोटहरूले किक, गोल र लडाइँ गरे । 

यो कार्यक्रम अगस्टमा बेइजिङमा हुने विश्व ह्युमनोइड रोबोट खेलहरूको पूर्वावलोकनको रूपमा आयोजित थियो ।   आयोजकहरूका अनुसार, खेलको मुख्य विशेषता सबै रोबोटहरूले मानव हस्तक्षेप वा पर्यवेक्षणबिना पूर्ण रूपमा स्वायत्त रूपमा एआई प्रेरित रणनीतिहरू प्रयोग गरे । 

यी रोबोटहरू लडिसकेपछि आफैँ उठ्न सक्ने गरी डिजाइन गरिएका थिए । तथापि, खेलका क्रममा केही रोबोटहरूलाई कर्मचारीहरूले स्ट्रेचरमा बोकेर मैदानबाट बाहिर लैजानुपरेको थियो । 

चीनले म्याराथन, बक्सिङ र फुटबलजस्ता खेल प्रतियोगिताहरूलाई वास्तविक विश्वको परीक्षण मैदानको रूपमा प्रयोग गरी एआई संचालित ह्युमनोइड रोबोटहरूको विकासमा तीव्रता दिइरहेको छ ।

बूस्टर रोबोटिक्सका संस्थापक चेङ हाओले रोबोटहरूको क्षमता समयसँगै तीव्र रूपमा वृद्धि हुने र अन्ततः वयस्क टोलीहरूलाई चुनौती दिन सक्ने बताए । 

“हामीले रोबोट प्रतियोगिताका लागि फुटबल परिदृश्य छनोट गर्नुका दुई कारण छन् । पहिलो, विद्यार्थीहरूलाई वास्तविक विश्वको रोबोटिक्समा आफ्ना एल्गोरिदमिक सीपहरू लागू गर्न प्रोत्साहन गर्न र दोस्रो, रोबोटहरूको स्वायत्त र स्थिर रूपमा हिँड्ने, टक्कर सहन सक्ने, र उच्च स्तरको बुद्धिमत्ता तथा सुरक्षा प्रदर्शन गर्ने क्षमता प्रदर्शन गर्न,” चेङले भने ।