काठमाडौं । नेकपा (एमाले) सुदूरपश्चिम प्रदेश कमिटीको नेतृत्वका निम्ति सहमतिको प्रयास जारी छ । नेतृत्वका आकांक्षीबीच सहमति जुटाउने कोसिसमा नेताहरू लागेपछि बन्दसत्र अझै सुरु भएको छैन ।

पार्टीको पहिलो प्रदेश अधिवेशन उद्घाटनसत्रका क्रममा अध्यक्ष केपी शर्मा ओलीले सहमतिमा नेतृत्व टुंग्याउन निर्देशन दिएका थिए । सहमतिबाटै नेतृत्व छान्न महासचिव शंकर पोखरेल धनगढीमै छन् ।

प्रदेश इन्चार्ज एवं सचिव छविलाल विश्वकर्मा, स्थायी कमिटी सदस्य कर्णबहादुर थापालगायत नेताले सहमतिको प्रयास गरिरहेका छन् । उनीहरूले पोलिटब्युरो, केन्द्रीय सदस्य, जिल्ला अध्यक्षलगायत नेतासँग छलफल गरिरहेका छन् ।

अध्यक्षमा कृष्णप्रसाद जैसी, कमल तिमिल्सिना र बचनबहादुर सिंहले दाबी गरेका छन् । बिहानैदेखि सहमतिको प्रयास भए पनि अझै केही निष्कर्ष ननिस्किएको एक नेताले बताए । सोमबार बिहानदेखि सुरु हुने भनिएको बन्दसत्र सोही कारण धकेलिएको उनको भनाइ छ ।

“सहमति कि निर्वाचनको सम्भावना उस्ताउस्तै छ,” ती नेताले बाह्रखरीसित भने, “अझै पिक्चर आइसकेको छैन ।”

ती नेताका अनुसार निर्वाचन नै भए जैसी र तिमिल्सिनाबीच प्रतिस्पर्धा हुने सम्भावना प्रबल छ । स्थायी कमिटी सदस्य थापा जैसीको नाममा सहमति हुनुपर्ने पक्षमा छन् ।

“कृष्णप्रसादजीको नाममा सहमति गरौँ भन्ने हो,” उनीनिकट स्रोतले भन्यो, “सहमति नभए स्वस्थ प्रतिस्पर्धा हुन्छ ।”