काठमाडौं । राष्ट्रिय प्रजातन्त्र पार्टी (राप्रपा)ले प्यालेस्टाइनको चरमपन्थी समूह हमासले इजरायलमा सर्वसाधारण समेतलाई लक्षित गरी गरिएको आक्रमणको निन्दा गरेको छ ।

“आमसर्वसाधारण समेतलाई लक्षित गरी गरिएको उक्त आक्रमण निन्दनीय छ,” राप्रपाद्वारा आइतबार जारी विज्ञप्तिमा उल्लेख छ ।

हमासद्वारा इजरायलमा गरिएको आक्रमणमा परी कैयौँ सर्वसाधारणसहित नेपाली नागरिक पनि गम्भीर घाइते भएको खबरले चिन्तित बनाएको राप्रपाले जनाएको छ ।

“उक्त आक्रमणमा परेका र सम्भाव्य जोखिममा रहेका नेपाली नागरिकहरूको यथाशीघ्र उपचार तथा उद्धारको व्यवस्था मिलाउनको लागि नेपाल सरकार, इजरायलस्थित नेपाली राजदूतावास तथा अन्य स्वयंसेवी संघसंस्थाहरूलाई अनुरोध गर्दछौँ,” राप्रपाले भनेको छ ।

शनिबार बिहान हमासले अचानक इजरायलमाथि आक्रमण सुरु गरेको थियो । त्यसपछि हमास र इजरायलको सेनाबीचको संघर्ष जारी छ ।

सो क्षेत्रमा ११ नेपाली सम्पर्कविहीन छन् । घाइते १० नेपालीको स्थानीय अस्पतालमा उपचार भइरहेको छ ।