काठमाडौं । सर्वोच्च अदालतले नेपालगञ्जका योगराज ढकाल (रिगल) को कैद मिनाहा गर्ने निर्णयविरुद्ध परेको रिटमा कारण देखाऊ आदेश जारी गरेको छ । 

बिहीबार न्यायाधीश डा. मनोजकुमार शर्माको इजलासले सात दिनभित्र लिखित जवाफ पेस गर्न आदेश दिएको हो ।

सर्वोच्चले असोज २४ गते साँझ ५ बजेभित्र लिखित जवाफ पेस गर्न भनेको छ ।

"यसमा के कसो भएको हो ? निवेदकको मागबमोजिम उत्प्रेषणसमेतको आदेश किन जारी हुनु नपर्ने हो ? आदेश जारी हुन नपर्ने मनासिब आधार, कारण र प्रमाण भए सोसमेत खुलाई प्रत्यर्थी मध्येका रिगल ढकाललाई आफैँ वा आफ्नो कानूनबमोजिमको प्रतिनिधिमार्फत र अन्य प्रत्यर्थीहरूको हकमा महान्यायाधिवक्ताको कार्यालयमार्फत सर्वोच्च अदालत नियमावली, २०७४ को नियम ४६ (१) बमोजिम मिति २०८०।०६।२४ गते साँझ ५:०० बजेभित्र लिखित जवाफ पेस गर्नु भनी यो आदेश र रिट निवेदनको प्रतिलिपिसमेत साथै राखी विपक्षीहरूको नाममा म्याद सूचना तत्काल तामेल गराउनू," आदेशमा भनिएको छ । 

• रिगलको कैद मिनाहा मुद्दामा सर्वोच्चले भन्यो– भारती शेर्पाको परिवारलाई सुरक्षा दिनू

संविधान दिवसको अवसरमा ३ असोजमा मन्त्रिपरिषद्को सिफारिसमा राष्ट्रपतिले चेतन मानन्धरको हत्या प्रकरणमा जन्मकैदको सजाय पाएका रिगलको कैद मिनाहा गरेका थिए ।

मानन्धरकी पत्नी भारतीले सोही निर्णयविरुद्ध सर्वोच्चमा रिट दिएकी थिइन् । 

रिगल घटना भएकाले बेला नेपाली कांग्रेसको युवा संगठन तरुण दलमा आबद्ध थिए ।  हत्या अभियोगमा उनलाई जिल्ला अदालत बाँकेका तत्कालीन न्यायाधीश विष्णु सुवेदीको इजलासले २०७६ साल वैशाखमा दोषी ठहर गर्दै सर्वस्वसहित जन्मकैदको सजाय सुनाएको थियो । 

साथै, उक्त घट्नामा संलग्न अन्य १० जनालाई संलग्नताको प्रकृति हेरर तीन वर्षदेखि १० वर्षसम्म कैद सजाय तोकिएको थियो ।  रिगलमाथि २०७२ साल असार २८ गते नेपालगञ्जको धम्बोजी चोकमा दिउँसो ३ बजेतिर चेतन मानन्धरमाथि खुँडा प्रहार गरी हत्या गरेको अभियोग थियो ।