काठमाडौं । अभिनेता शाहरूख खान अभिनीत चलचित्र ‘जवान’ले बलिउडमा नयाँ रेकर्ड कायम गरेको छ । ‘जवान’ सर्वाधिक कमाइ गर्ने हिन्दी सिनेमा बनेको छ ।  

‘जवान’ले ५२५ करोड ५० लाख भारू कलेक्सन गरेको छ । योसँगै ‘जवान’ले चलचित्र ‘गदर–२’को रेकर्डलाई पछि पारेको बलिउड सिनेमाका ट्रेड एनलाइसिस्ट तरण आदर्शले बताएका छन् । 

यसअघि ‘गदर–२’ सबैभन्दा धेरै ५२४ करोड ७५ लाख भारू कलेक्सन गरेको थियाे । 

‘जवान’ले पहिलो हप्ता ३४७ करोड ९८ लाख, दोस्रो हप्ता १२५ करोड ४६ लाख र तेस्रो हप्ता ५२ करोड ५० लाख कलेक्सन गरेको तरणले बताएका छन् । 
  
‘जवान’ विश्वभरबाट एक हजार ३६ करोड कलेक्सन गरिसकेको छ । यो सिनेमा अझै हलबाट उत्रिएको छैन । त्यसैले यसकाे कलेक्सन थप बढ्नेछ । 

एटली कुमारले निर्देशन गरेको चलचित्र ‘जवान’मा शाहरूख मुख्य भूमिकामा छन् ।