काठमाडौं । प्रतिनिधिसभाका सभामुख देवराज घिमिरेले सूचनाको हक प्रजातन्त्रको अभिन्न अंग रहेकाले यसलाई बलियो बनाउँदै लैजानुपर्नेमा जोड दिएका छन् ।

सूचनाको हकका लागि राष्ट्रिय महासंघले बिहीबार काठमाडौंमा आयोजना गरेको प्रथम राष्ट्रिय सम्मेलन उद्घाटन गर्दै सभामुख घिमिरेले सार्वजनिक निकायलाई जनउत्तरदायी बनाउनका लागि सूचनाको हक महत्वपूर्ण र प्रजातन्त्रको अभिन्न अंग पनि रहेकाले यसलाई बलियो बनाउदै लैजानुपर्नेमा जोड दिए ।

संविधानले व्यवस्था गरेको कुराहरुलाई कानुनी रुप दिनुपर्ने धेरै काम बाँकी रहेको अवस्थामा कानुनमा रहेका व्यवस्थालाई पनि सदुपयोग गराउन सूचनाको हक महत्वपूर्ण रहेको उनले बताए ।

त्यस्तै, सभामुख घिमिरेले मुलुकलाई उन्नतिको दिशातर्फ उन्मुख गराउन सार्वजनिक निकायहरुले पारदर्शी ढंगले काम गर्नका लागि सूचनाको हकले प्रेरित गरेको जिकिर गररे ।