![भुटानलाई हराउँदै भारत समूह विजेता, फाइनल प्रवेशका लागि नेपालसँग खेल्ने](https://12khari.top/uploads/posts/India-U19-Football-1695649335.jpg)
काठमाडौं । साफ यू–१९ च्याम्पियनसिपको फाइनल प्रवेशका लागि साविक विजेता भारतले नेपालसँग खेल्ने भएको छ । सोमबार भुटानलाई २–१ ले हराएर समूह ‘बी’को विजेता बनेपछि भारतले नेपाललाई अन्तिम चारमा प्रतिद्वन्दीको रूपमा पाएको हो ।
त्रिपुरेश्वरस्थित दशरथ रंगशालामा सम्पन्न खेलमा भारतलाई जित दिलाउन ग्वग्वम्सर गोयारी र रिकी मितेई हाओबमले गोल गरे । भुटानका पेन्जोर ग्याल्सेनले गोल गरेका थिए ।
खेलमा सुरुआती अग्रता भने भुटानले बनाएको थियो । पेन्जोर ग्याल्सेनले २१औँ मिनेटमा गोल गर्दै भुटानलाई अग्रता दिलाएका थिए । तर, भुटानको यो अग्रता पहिलो हाफसम्म पनि कायम रहन सकेन ।
ग्वग्वम्सर गोयारीले गोल ३७औँ मिनेटमा गोल गर्दै भारतलाई खेलमा फर्काएका थिए । यस्तै, ६५औँ मिनेटमा रिकी मितेई हाओबमले गोल गर्दै भारतलाई २–१ को अग्रतामा राखेका थिए । यसपछि थप गोल हुन नसक्दा भारतले पुनरागमन जित निकाल्दै अन्तिम चारमा स्थान पक्का गरेको हो ।
भारतले यसअघि समूहको पहिलो खेलमा बंगलादेशलाई ३–० ले हराएको थियो । हारका बाबजुद भुटान पनि समूह ‘बी’ को उपविजेता बन्दै सेमिफाइनलमा प्रवेश गरेको छ । भुटानले यसअघि बंगलादेशलाई ४–३ ले हराएको थियो ।
अब भारतले बुधबार नेपालसँग फाइनल प्रवेशका लागि खेल्ने छ । यसअघि नेपालले आजै भएको समूह ‘बी’ को खेलमा माल्दिभ्सलाई ४–१ ले हराउँदै उपविजेताको रूपमा सेमिफाइनलमा स्थान बनाएको थियो । यस्तै, दोस्रो सेमिफाइनलमा भुटानले समूह ‘ए’ को विजेता पाकिस्तानसँग खेल्ने छ ।