काठमाडौं । धितोपत्र दोस्रो बजार मापक नेप्से परिसूचक साताको पहिलो दिन आइतबार १९.४३ अंकले घटेको छ । नेप्से परिसूचक घटेसँगै कारोबार रकममा पनि कमी आएको छ ।

गएको बिहीबारको तुलनामा कारोबार रकम एक अर्बभन्दा बढीले घटेको छ । यस दिन दुई अर्ब ३२ करोड रुपैयाँको सेयर कारोबार भएको छ । बिहीबार तीन अर्ब २९ करोड रुपैयाँको सेयर कारोबार भएको नेपाल स्टक एक्सचेन्ज (नेप्से)ले जानकारी दिएको छ ।

आज नेप्से परिसूचक ०.९५ प्रतिशत घटेर २०१०.३५ विन्दुमा बन्द भएको छ । घटेको बजारमा चार कम्पनीको सेयर मूल्य सर्वाधिक वृद्धि भएको छ ।

स्वरोजगार लघुवित्त वित्तीय संस्था, हिमालयन लघुवित्त वित्तीय संस्था र एसियन हाइड्रोपावर लिमिटेडको सेयर मूल्य १० प्रतिशतले बढेको छ । थ्री स्टार हाइड्रोपावर लिमिटेडको सेयर मूल्य ९.७९ प्रतिशतले वृद्धि भएको छ ।

शुभम पावर लिमिटेडको सेयर मूल्य १० प्रतिशतले घटेको छ ।

माछापुच्छ्रे बैंकको सेयर कारोबारले सर्वाधिक हिस्सा ओगटेको छ । यो कम्पनीको १३ करोड २४ लाख रुपैयाँको सेयर कारोबार भएको छ ।

कारोबारमा आएका १३ समूहगत परिसूचकमध्ये लघुवित्त समूहको परिसूचक बढेको छ । लघुवित्त समूहको परिसूचक ०.९९ पतिशतले बढेको छ ।

सर्वाधिक परिसूचक घट्नेमा फाइनान्स समूह छ । यो समूहको परिसूचक १.९८ प्रतिशतले घटेको छ ।