काठमाडौं । पाकिस्तान काठमाडौंमा जारी साफ यू–१९ च्याम्पियनसिपको सेमिफाइनलमा प्रवेश गरेको छ । पाकिस्तानले शनिबार समूह ‘ए’मा माल्दिभ्सविरुद्ध १–१ को बराबरी खेल्दै सेमिफाइनलमा स्थान पक्का गरेको हो ।

यो बराबरीसँगै चार अंकसहित पाकिस्तान प्रतियोगिताको अन्तिम चारमा प्रवेश गरेको हो । पाकिस्तानले यसअघि समूहको पहिलो खेलमा नेपाललाई १–० ले हराएको थियो ।

शनिबार त्रिपुरेश्वरस्थित दशरथ रंगशालामा सम्पन्न खेलमा कप्तान सनान राशिदले ३९औँ मिनेटमा गरेको गोलबाट माल्दिभ्सले अग्रता बनाएको थियो । तर, माल्दिभ्स खेलको अन्तिम ६ मिनेट सम्हालिन नसक्दा अंक बाढ्न बाध्य बन्यो । ८४औँ मिनेटमा साह जहानले गोल गर्दै पाकिस्तानलाई खेलमा फर्काएका थिए ।

आजै भएको समूह ‘बी’को खेलमा भुटानसँग हार बेहोरेपछि बंगलादेश भने समूह चरणबाटै बाहिरिएको छ । दशरथ रंगशालामा भएको रोमाञ्चक खेलमा भुटानले बंगलादेशलाई ४–३ ले हराएको थियो । भुटानको जितमा जिग्मे नाम्गेलले दुई गोल गरे । यस्तै, किङ्जाङ तेन्जिन र रिन्जान दोर्जीले समान एक गोल गरे । बंगलादेशका रुबेन सेख, असादुल मोला र राजु अहमेदले गोल गरे पनि हार भने टार्न सकेनन् ।

बंगलादेश यसअघि पहिलो खेलमा भारतसँग ३–० ले पराजित भएको थियो । भुटानको भने यो प्रतियोगिताको पहिलो खेल हो ।