काठमाडौं । अमेरिकामा एक अत्याधुनिक लडाकु विमान हराएपछि सरकारी अधिकारीहरुले नागरिकलाई देखे, भेटेमा जानकारी गराउन आग्रह गरेका छन् । आइतबार अमेरिकाको दक्षिणी क्यारोलिनाबाट एफ–३५ लडाकु विमान हराएको हो ।

अधिकारीहरुले विमान दुर्घटनाको जोखिममा रहेको भनेपछि त्यसमा रहेका पाइलट उछिट्टिएर अथवा ‘इजेक्ड’ भएर बाहिर निस्केका थिए ।

केही लडाकु विमानहरुमा खतराका बेला पाइलट बाहिर निस्किन सक्ने अथवा इजेक्ट हुन सक्ने विशेष सुविधा उपलब्ध छ । खतराका बेला इजेक्ट हुन चाहे ‘ठूलो बल’ले पाइलटलाई अगाडि फालिन्छ र प्यारासुटको मद्दतले अवतरण हुन्छ ।

आइतबारको यो घटनापछि अस्पताल लगिएका पाइलटको अवस्था  स्थिर रहेको बताइएको छ । त्यसपछि उक्त विमान भने सम्पर्कविहीन भएको हो ।

घटनापछि अमेरिकी बेस डिफेन्स अपरेसन सेन्टरले एफ–३५ बारे कुनै जानकारी भएमा फोन गरेर जानकारी दिन आग्रह गरेको छ । लकहिड मार्टिनले बनाएको यी विमानको मूल्य आठ करोड अमेरिकी डलर (करिब १० अर्ब नेपाली रुपैयाँ बराबर) पर्छ ।