काठमाडौं । ६१ किलो सुन तस्करी प्रकरणको अनुसन्धानका क्रममा थप केही नेपाली र भारतीय सुन व्यवसायीको संलग्नता खुलेको छ । प्रहरीको केन्द्रीय अनुसन्धान ब्यूरो (सीआईबी)ले पक्राउ गरेका बाराका सुनचाँदी व्यवसायी शिवकुमार सराफ र सिन्धुलीका सुमन खरेलले केही नेपाली र भारतीय सुन व्यवसायीको नाम पोलेको सीआईबी स्रोतले बतायो ।

"चिनियाँ तस्करबाट खरेलले सुन लिएर विभिन्न नेपाली र भारतीय सुन व्यवसायीलाई दिने गरेको खुलेको छ । हामी थप अनुसन्धान गर्दैछौँ," स्रोतले भन्यो ।

२१ भदौमा पक्राउ परेका खरेलकै बयानका आधारमा बाराका सुनचाँदी व्यवसायी सराफ पक्राउ परेका हुन् । सराफबाहेक खरेलले अन्य व्यवसायीलाई समेत तस्करीको सुन बिक्री गर्ने गरेको खुलेको छ ।

सुन तस्करी समूहका चिनियाँ नागरिक याहो पेचिङसँग खरेलको सुन लिएर विभिन्न ठाउँमा पुर्‍याउने काम गरेका थिए । पेचिङसँग खरेलको हुन्डी कारोबारमार्फत सम्पर्क भएको देखिएको छ । सीआईबी स्रोतका अनुसार पक्राउ परेका चिनियाँ समूहले एक वर्षदेखि सुन तस्करीको धन्दा सुरु गरेको खुलेको छ ।

सीआईबीले उनीहरूले विभिन्न ठाउँमा खोलेको १० वटा गोदाममा छापा मारेको छ । त्यसमध्ये सातवटा गोदामबाट सातवटै सुन गाल्ने मेसिन बरामद गरिएको छ । उनीहरूले भन्सारका कर्मचारीलाई प्रभावमा पारेर सुन तस्करीको धन्दा थालेको देखिएको छ ।

सीआईबी स्रोतले भन्यो, "उनीहरूले भन्सारका कर्मचारीहरूलाई मुख्य प्रभावमा पारेर तस्करीको काम गरेको देखिन्छ । उनीहरूले पानी तान्ने मेसिन, ब्रेक सू, दाह्री काट्ने मेसिन, स्मार्ट वाचमा समेत लुकाएर सुन तस्करी गरेको देखिएको छ ।’

सुन तस्करलाई सघाएको आरोपमा सीआईबीले हालसम्म सातजना विमानस्थल भन्सारका कर्मचारीलाई पक्राउ गरेको छ । जसमा पुष्पा जोशी र सन्तोष चन्द भन्सार अधिकृत हुन् । पेचिङसहित चिनियाँ नागरिक ली विन, ली नेङकी, देन सेङ गरी ६ जना पक्राउ परेका छन् ।

२ साउनमा सिनामंगलबाट राजस्व अनुसन्धान विभागको टोलीले बरामद गरेको सुन प्रकरणको अनुसन्धान अब अन्तिम चरणमा पुगेको छ । सीआईबीले मंगलबारभित्र पूरक अनुसन्धान गर्न मिल्ने गरी प्रतिवेदन बुझाउने तयारी गरेको छ । हालसम्म पक्राउ परेका ३० जनाबाहेक थप केहीलाई प्रतिवादी बनाएर अनुसन्धान फाइल बुझाउने तयारी सीआईबीको छ ।

सुन तस्करी प्रकरणमा हालसम्म तिब्बती मूलका बेल्जियमका नागरिक दावा छिरिङ, याहो पेचिङसहित ६ जना चिनियाँ नागरिक मुख्य तस्कर रहेको पाइएको सीआईबीको निष्कर्ष छ ।

दावासँग सम्पर्क देखिएका विध ल्याबका सञ्चालक भीमकान्त भण्डारीसँग सीआईबीले आइतबार कागजी बयान गरेको छ । यसअघि दावासँग सम्बन्ध देखिएका पूर्वउपराष्ट्रपति नन्दबहादुर पुनका छोरा एवं अखिल क्रान्तिकारी महासचिव दिपेश पुनसँगसमेत कागजी बयान लिएको थियो ।

त्यस्तै, तत्कालीन अध्यागमन विभागका प्रमुख झलकराम अधिकारीसँग सीआईबीले केहीदिन अगाडि नै बयान लिइसकेको छ । उच्च तहका कर्मचारी तथा राज्यका उपल्लो तहमा पुगेका मानिसको संलग्नताबिनै ठूलो मात्रामा सुन तस्करी भएको देखिएको अनुसन्धानमा खटिएका प्रहरी अधिकारीले बताए ।

सुन तस्करीको अनुसन्धान सीआईबीले संगठित अपराध मुद्दा चलाएर गरेको थियो । संगठित अपराधको अनुसन्धान प्रहरीलाई ६० दिन थुनामा राखेर गर्न मिल्ले कानुनी व्यवस्था छ । आइतबार तस्करी प्रकरणमा अनसन्धान सुरु भएको ५४ दिन पुगेको छ  । समय अभावका कारण सुमन खरेलले पोलेका केही व्यक्तिमाथि अर्कोपटक अनुसन्धान गर्ने तयारी सीआईबीको छ ।

हङकङमा थियो चारवटा गोदाम

प्रहरी प्रधान कार्यालयले सुन तस्करीको अनुसन्धान गर्न सीआईबीका एसएसपी दिनेश आचार्यलाई हङकङ पठाएको थियो ।

१३ भदौमा हङकङ गएका आचार्य शुक्रबारमात्रै नेपाल फर्किका छन् । हङकङ प्रहरीको सहयोगमा उनले सुन तस्करीबारे अनुसन्धान गरेका थिए । जसमा नेपालमा सुन सप्लाई गर्न चिनियाँ गिरोहका नाइके याहो पेचिङसहितका समूहले चारवटा गोदाम खडा गरेको देखिएको छ ।

केही चिनियाँ हङकङमै बसेर सुन तस्करीको लागि लगानी गर्ने गरेको पनि देखिएको छ । हङकङमा देखिएको सुनबारे छुट्टै रिपोर्ट बनाउने सीआईबीको तयारी छ ।