काठमाडौं । पाठेघरको मुखको क्यान्सर गराउने ह्युमन प्यापिलोमा भाइरस (एचपीभी)विरुद्धको खोप नेपालमा पहिलोपटक दिइने भएको छ । सरकारले पहिलो चरणमा नमुनाका रूपमा १४ वर्ष उमेर समूहका किशोरीलाई यो खोप दिन लागेको हो ।
खोप कार्यक्रम आउँदो असोज २७ गतेदेखि सुरु गरिनेछ । सातै प्रदेशका एक/एक सरकारी अस्पतालबाट खोप दिइनेछ । पहिलो चरणमा नौ हजार ५०० किशोरीलाई खोप दिइने परिवार कल्याण महाशाखाअन्तर्गतको खोप शाखाले जनाएको छ ।
यसअघि, ‘पाइलट प्रोजेक्ट’का लागि थोरै मात्रामा खोप ल्याइएको थियो ।
कहिले कति डोज लगाउने ?
एचपीभीविरुद्धको खोपले पाठेघरको क्यान्सरविरुद्ध काम गर्ने शाखाले जनाएको छ । प्रजनन् उमेरमा प्रवेश गर्दै गरेका किशोरीलाई लक्षित गरी खोप दिन लागिएको हो । यो खोप ६ महिनाको अन्तरालमा दुई डोज लगाउनुर्छ ।
खोप लगाउन जन्ममिति खुल्ने कागजात लिएर तोकिएका अस्पतालमा जानुपर्छ । खोपको डोज पूरा गरेकाहरूमा एचपीभीका कारण हुने संक्रमणबाट जोगिने सम्भावना ९५ प्रतिशतसम्म हुने खोप शाखा प्रमुख डा. अभियान गौतमले बताए ।
सबै प्रदेश र जिल्लाका किशोरीहरूमाझ पुर्याउन सन् २०२४ सम्म थप खोप ल्याइने गरी छलफल अघि बढाइएको स्वास्थ्य सेवा विभागका महानिर्देशक डा. संगीता मिश्राले जानकारी दिइन् । देशभरका १४ वर्ष उमेरका किशोरीलाई मात्र दिन १३ लाख ५० हजार डोज खोप आवश्यक पर्ने उनले उल्लेख गरिन् ।
यो खोप दिइने अस्पतालको सूची हेर्नोस्–
