काठमाडौं । जिल्ला प्रशासन कार्यालय (जिप्रका) काठमाडौंले कानुनको दृष्टिमा सबै समान रहेको जनाएको छ ।

काठमाडौंका महानगरपालिकाका मेयर बालेन्द्र शाह (बालेन)ले ट्राफिक प्रहरीबाट आफ्नो परिवारमाथि दुर्व्यवहार भएको आइतबार आरोप लगाएका थिए । त्यसको भोलिपल्ट सोमबार विज्ञप्ति जारी गरी जिप्रका काठमाडौंले यस्तो जनाएको छ ।

जिप्रकाले जारी गरेको विज्ञप्तिमा कुनै ठाउँमा पनि मेयर बालेनको नाम उल्लेख छैन । “पछिल्लो समयमा असल मनसायबाट सम्पादन भएका सरकारी काम र त्यस्तो काममा खटिएका राष्ट्रसेवकहरूलाई निरुत्साहित गर्ने गरी सामाजिक सञ्जालहरूमा व्यक्त भएका अभिव्यक्तिहरूप्रति यस कार्यालयको गम्भीर ध्यानाकर्षण भएको छ,” जिप्रकाले विज्ञप्तिमा भनेको छ ।

राष्ट्रसेवक कर्मचारीलाई कर्तव्यपालनामा बाधा नपुर्‍याउन र विभिन्न सामाजिक सञ्जालमा जथाभावी वक्तव्यबाजी नगर्न समेत अनुरोध गरिएको छ ।

“हामीले अवलम्बन गरेको लोकतन्त्र र विधिको शासनले कानुनको दृष्टिमा सबै समान छन् भन्ने कुरा स्थापित गरेको व्यहोरा जगजाहेर छ । प्रचलित कानुनको बर्खिलाप गरिने जुनसुकै गतिविधिहरू नियन्त्रण गर्न र विधिको शासन प्रत्याभूत गर्न स्थानीय प्रशासन तथा सुरक्षा निकाय प्रतिबद्ध रहेको छ,” जिप्रका काठमाडौंले भनेको छ ।

सार्वजनिक बिदाका दिनमा सरकारी सवारीसाधनको सञ्चालनमा निगरानी र नियन्त्रण गर्ने कार्य सबै जिल्ला प्रशासन कार्यालयमार्फत विगतदेखि नै गरिँदै आएको स्मरण समेत गराइएको छ ।

“सरकारी कामका लागि बिदाका दिनमा सरकारी सवारीसाधन प्रयोग गर्नुपर्दा तोकिएका अधिकारीबाट जारी भएको सवारी पास प्रयोग गर्न पाउने स्पष्ट व्यवस्था रहेको छ । यसबाट निजी काममा सरकारी सवारीसाधनको प्रयोगमा कमी आई मितव्ययिता अभिवृद्धि गर्न मद्दत पुगेको कुरा निर्विवाद छ,” जिप्रकाले भनेको छ ।

गृह मन्त्रालयको निर्देशनानुसार सरकारी स्रोतसाधनको दुरुपयोग नियन्त्रणका लागि स्थानीय प्रशासन निरन्तर क्रियाशील रहेको विज्ञप्तिमा जनाइएको छ ।

“सुरक्षाकर्मी एवम् कर्मचारीहरू विद्यमान कानुन एवम् नीति निर्देशनको पालना गर्न/गराउन अहोरात्र फिल्डमा खटिएर काम गर्दै आएका छन्,” विज्ञप्तिमा उल्लेख छ, “आफूलाई प्राप्त जिम्मेवारी पूरा गर्न यसरी खटिने सुरक्षाकर्मी र कर्मचारीहरूलाई जिम्मेवार सरकारी निकाय, पदाधिकारी, नागरिक समाज र आमनागरिकका तर्फबाट उचित सहयोग, समर्थन र हौसला सदैव अपेक्षित हुन्छ ।”

शनिबार मेयर बालेनकी श्रीमती चढेको सरकारी नम्बरप्लेटको गाडीलाई ट्राफिक प्रहरीले जाँचका क्रममा कोटेश्वरमा रोकेको थियो । सरकारी गाडी सार्वजनिक बिदाका दिनमा चलाउन पाइँदैन । चलाउनै परे विशेष पास आवश्यक पर्छ । तर, विशेष पासबिना नै गाडी चलाइएका कारण ट्राफिक प्रहरीले केही बेर सोधपुछ गरी छोडेको थियो ।

श्रीमती चढेको आफ्नो सरकारी गाडीलाई ट्राफिकले रोकेको थाहा पाएपछि आक्रोशित बनेका मेयर बालेनले सामाजिक सञ्जालमार्फत ‘सिंहदरबारमा आगो लगाइदिने’ धम्की दिएका थिए । धम्कीको चौतर्फी आलोचना भएपछि उनले उक्त अभिव्यक्तिलाई सामाजिक सञ्जालबाट हटाएका छन् ।

उनको सचिवालयले आइतबार विज्ञप्ति जारी गरी जाँच गर्ने ट्राफिक प्रहरीले मदिरा सेवन गरेको आरोप लगाइएको थियो । त्यसपछि सोमबार जिप्रका काठमाडौंले विज्ञप्ति जारी गर्दै बालेनको नाम नलिई कानुनको दृष्टिमा सबै समान हुने र गल्ती गर्नेलाई कारबाही गर्ने कार्य नरोकिने स्पष्ट पारेको हो ।