काठमाडौं । बलिङ, ब्याटिङ र फिल्डिङ तीनै पक्षमा चुकेको नेपालले एसिया कप–२०२३ को उद्घाटन खेलमा पाकिस्तानसँग २३८ रनको फराकिलो हार बेहोरेको छ ।

मुल्तानस्थित मुल्तान क्रिकेट रंगशालमा पाकिस्तानले प्रस्तुत गरेको ३४३ रनको लक्ष्य पछ्याएको नेपाल २३.४ ओभरमा १०४ रनमै समेटियो ।

पाकिस्तानविरुद्ध नेपालले ब्याटिङ, बलिङ र फिल्डिङमा निराशजनक प्रदर्शन गर्‍यो । पाकिस्तानको घातक बलिङसामु नेपालका कुनै पनि ब्याटर खुलेर खेल्न सकेनन् । नेपालका सोमपाल कामीले २८ रन बनाए । ३–१४ को नाजुक अवस्थामा रहँदा सोमपालले आरिफ सेखसँग ५९ रनको साझेदारी गर्दै नेपालको इनिङ सम्हाल्ने प्रयास गरेका थिए । तर, टिमले ७३ रन जोड्दा आरिफलाई चौथो विकेटको रूपमा गुमाएपछि नेपालको इनिङ धरासायी बन्यो । 

आरिफले टिमको खातामा २६ रन थपे । गुल्सन झाले १३ रन जोडे । यसबाहेक, नेपालका कुनै पनि ब्याटरले दोहोरो अंकमा रन जोड्न सकेनन् । ओपनर कुशल भुर्तेल र आसिफ सेख क्रमशः आठ र पाँच रन बनाए । करण केसी सात रनमा अविजित रहँदा कुशल मल्लले ६ र दीपेन्द्रसिंह ऐरीले तीन रन थपे  । नेपालका कप्तान रोहितकुमार पौडेल ‘गोल्डेन डक’ हुँदा सन्दीप लामिछाने र ललितनारायण राजवंशी डक भए ।

नेपाललाई सस्तैमा समेट्न पाकिस्तानका सदाब खानले चार विकेट लिए । ६.४ ओभरमा २७ रन खर्चिए । साहिनसाह अफ्रिदी र ह्यारिस रौफले समान दुई विकेट लिए । नसिम साह र मोहम्मद नवाजले एक–एक विकेट हात पारे ।

त्यसअघि कप्तान बाबर आजम र इफ्तिखर अहमेदको शतकमा टस जितेर ब्याटिङमा आएको पाकिस्तानले निर्धारित ५० ओभरमा ६ विकेट गुमाएर ३४२ रनको योगफल खडा गरेको थियो ।

नेपालविरुद्ध उत्कृष्ट लयमा देखिएका बाबरले १५१ रन बनाए । बाबरले १३१ बलमा १४ चौका र चार छक्का प्रहार गरे । बाबर व्यक्तिगत ५३ रनमा रहँदा करण केसीले क्याच छुटाएका थिए ।

बाबर र इफ्तिखरले पाँचौँ विकेटका लागि २१४ रनको ठूलो साझेदारी गरेपछि पाकिस्तान विशाल योगफलतर्फ अघि बढेको थियो । छैटौँ नम्बरमा ब्याटिङका लागि आएका इफ्तिखरले ७१ बलमा ११ चौका र चार छक्कासहित १०९ रन बनाए ।

त्यसअघि २५–२ को कठिन अवस्थामा रहँदा पाकिस्तानबाट ब्याटिङका लागि आएका बाबरले मोहम्मद रिजवानसँग तेस्रो विकेटका लागि ८६ रनको साझेदारी गर्दै टिमको इनिङ सम्हालेका थिए । तेस्रो विकेटका लागि बाबरलाई साथ दिएका रिजवान ५० बलमा ६ चौकासहित ४४ रन बनाएर आउट भए । 

यसबाहेक, पाकिस्तानका ओपनर फखर जमानले १४ रन जोड्दा इमाम उल–हक र आघा सल्मानले समान पाँच रन थपे । सदाब खानले चार रन जोडे ।

बलिङमा नेपालले इनिङको सुरुआतमा बलियो पकड जमाए पनि पहिलो पावर प्लेपछि सोही लय निरन्तरता दिन सकेन । नेपालका फिल्डरहरूको खराब फिल्डिङका कारण पाकिस्तानले शृंखलाबद्ध रूपमा चार रन उपहार पाइरहेको थियो ।

नेपालका सोमपाल कामीले दुई विकेट लिए । करण केसी र सन्दीप लामिछानेले समान एक विकेट लिए । यसबाहेक नेपालले अन्य दुई विकेट रन आउटबाट लिएको थियो । नेपालका कप्तान रोहित पौडेल र दीपेन्द्रसिंह ऐरीले ‘डाइरेक्ट थ्रो’ मार्फत नेपाललाई सफलता दिलाएका थिए ।

पहिलो पटक एसिया कप खेलिरहेको नेपाल भारत र पाकिस्तानसँगै समूह ‘ए’ मा छ । नेपालले अब भदौ १८ गते हुने भारतविरुद्धको खेलका लागि श्रीलंकाको यात्रा गर्ने छ ।