काठमाडौं । प्रधानमन्त्री पुष्पकमल दाहाल ‘प्रचण्ड’ले मंगलबार प्रतिनिधिसभा बैठकमा सांसदहरूले सोधेका प्रश्नको जवाफ दिइरहेका छन् ।

सोही क्रममा सांसद एकनाथ ढकालले ‘छोराको न्यायाका लागि शान्तिपूर्ण आन्दोलन गरिरहेका गंगामाया अधिकारीलाई भेट्न अस्पताल कहिले जानुहुन्छ ? गंगामायाको माग कहिले र कसरी सम्बोधन गर्नुहुन्छ ?’ भन्दै सोधे ।

जवाफमा प्रधानमन्त्री प्रचण्डले शान्ति प्रक्रियाको बाँकी रहेका काम पूरा गर्न आयोग बनाइएको र यससम्बन्धी विधेयक सदनमा रहेको उल्लेख गरे । त्यो विधेयक पारित भए समस्या समाधान हुने उनको भनाइ छ ।

उनले गंगामायाले पनि प्रचलित कानुनानुसार न्याय पाउने बताए । “संघीय सदनमा दर्ता भएको विधेयक पारित भएसँगै मुद्दा सम्बोधन हुन्छ । प्रचलित कानुनको अधीनमा रहेको नेपाल सरकार र यसका संयन्त्रले गंगगामाया अधिकारीलाई मानवीय सेवा र संरक्षण प्रदान गरिरहेको छ । अस्पतालको विवरणानुसार निजको स्वास्थ्य अवस्था सामान्य छ,” उनले भने, “उहाँको उपचारका लागि ३७ लाख ४७ हजार उपलब्ध गराएको जानकारी गराउँछु ।”