काठमाडौं । नेकपा (एमाले)का नेता गोकुल बास्कोटाले शुक्रबार सामाजिक सञ्जालमा असन्तुष्टि पोखेका छन् ।

पार्टीभित्रको कार्यशैलीप्रति पछिल्लो समय असन्तुष्ट रहेका बास्कोटाले जबज भन्न नजानेर गबज भन्नेहरु पार्टीमा हावी भएको संकेत गरेका छन् । उनले अस्पष्ट रुपमा पोखराको असन्तुष्टिमा अरुको कुरा काटेर जीवन गुजारा गर्नेहरुले अन्यमा खरानी ग्रुप बनाउने उल्लेख गरेका छन् ।

“कामको नाममा सिन्को नभाँच्ने, दुईजना मान्छे पार्टीमा ल्याउन नसक्ने, भएको संरचनामै २४ घण्टा घट्ट घुमेझैँ दाँती खिउन्जेल घुम्ने, जबज भन्या गजब भन्नेबाहेक अरू नजान्ने, पदबाहेक अरू नदेख्ने र अरुको कुरा काटेरै जीवन गुजारा गर्नेहरुले गर्ने क्रान्तिकारी काम अन्तिममा खरानी ग्रुप चलाउने,” बास्कोटाले ट्विटरमा लेखेका छन् ।

ओलीनिकट भएकै आधारमा पद लिने र काम गर्नेहरुका कुरा काट्नुलाई आफ्नो योग्यता मान्नेहरुविरुद्ध बास्कोटाले लेखेका हुन् ।

“खरानी ग्रुप सबै पार्टीमा छ । खासगरी ठूला पार्टीहरुमा यो रोग नै बनेको छ,” बास्कोटाले बाह्रखरीसँग भने, “तर, मैले आफ्नै पार्टीका लागि लेखेको हुँ । जो जो हो, उहाँहरुले बुझ्नुभएको छ ।”