काठमाडौं । लघुकथा समाज नेपालले १६औँ लघुकथा दिवस मनाउँदै २०८० सालको ‘पूर्णप्रसाद ब्राह्मण लघुकथा सम्मान’ लघुकथाकार लता केसीलाई समर्पण गरेको छ । सम्मानकासाथ नगद राशि २१ हजार एक रुपैयाँ पनि प्रदान गरियो ।

मंगलबार काठमाडौंस्थित सर्वनाम नाट्य घरमा आयोजित कार्यक्रममा प्रमुख अतिथि अग्रज कथाकार भागीरथी श्रेष्ठले केसीलाई सम्मानित गर्दै लघुकथाको विकास र विस्तारमा लता के.सी.सक्रियताको चर्चा गरिन् । उनले लघुकथाको श्रीवृद्धिका लागि समाजले गरेको काम स्तुत्य रहेको बताइन् ।

कार्यक्रममा साहित्यकार अशेष मल्लले लघुकथाका पाठक बढाउनुपर्नेमा जोड दिए । उनले आजका बालबालिकाको पहुँचमा पुग्नेगरी स्तरीय लघुकथा लेखिनुपर्ने उल्लेख गरे ।

प्रा.डा.लक्ष्मणप्रसाद गौतमले लघुकथा समाजले यस वर्ष लघुकथाको प्रवद्र्धनलाई सम्मानित गरेको उल्लेख गरे ।

सम्मानित व्यक्तित्व हाम्रो लघुकथा केन्द्र र हाम्रो लघुकथा फेसबुक पेजकी अध्यक्ष केसीले समाजद्वारा प्राप्त सम्मानले आफूलाई हौसला मिलेको उल्लेख गर्दै यस क्षेत्रमा लाग्न थप जिम्मेवारी बोध भएको बताइन् ।

कार्यक्रममा सम्मानका संस्थापक एवम् समाजका निवर्तमान अध्यक्ष तथा सल्लाहकार श्रीओम श्रेष्ठ रोदनले लघुकथालाई विधा नै नमानेको अवस्थामा बडो संघर्ष गर्दै लघुकथालाई यहाँसम्म ल्याइपुर्याएको स्मरण गरे । उनले लघुकथाको स्थायित्वका लागि अब अभियन्ताहरू लाग्नुपर्नेमा जोड दिए ।

कार्यक्रममा तुलसीहरि कोइराला, श्रीबाबु कार्की, राजेश खनाल, ममता मृदुलले पनि बोलेका थिए ।

समारोहमा सर्वनामका नाट्यकर्मीहरूले राज शाहको निर्देशनमा केसीका दुई लघुकथाहरू ‘दृश्य’ र ‘विधवा’को नाट्य मञ्चन गरेका थिए ।

सोही अवसरमा लघुकथा समाज नेपाल, कोसी प्रदेश समितिले १५/१५ दिनमा सञ्चालन गर्दै आएको लघुकथा प्रतियोगितामा विजयी सर्जकहरूलाई प्रमाणपत्र प्रदान गरेको थियो ।