काठमाडौं । नेपाली कांग्रेस सुन तस्करी प्रकरणबारे केन्द्रीय अनुसन्धान ब्युरो (सीआईबी)ले नै अनुसन्धान गर्नुपर्ने पक्षमा उभिएको छ । 

आज सकिएको संसदीय दलको बैठकले सुन तस्करी प्रकरणजस्ता प्रकृतिका अपराधजन्य कार्यका लागि अनुसन्धान, छानबिन र अभियोजन गर्ने प्रयोजनका लागि गठित भएको केन्द्रीय अनुसन्धान ब्युरोसहितका सरकारी निकायहरूले अनुसन्धान गरिरहेको बताएको छ ।

त्यसको अर्थ कांग्रेस सुन काण्डबारे उच्चस्तरी छानबिन समिति बनाउनुपर्ने पक्षमा छैन । जबकि कांग्रेसका केही नेताहरूले छानबिन संयन्त्रमा जोड दिइरहेका थिए । शेखर कोइराला, प्रदीप पौडेल, सुनील शर्मासहितका नेताहरूले छानबिन समिति बनाउनुपर्ने बताएका थिए ।

सरकारी अधिकारीहरूकै संलग्नता रहेको देखिएकाले सीआईबीले छानबिन गर्न नसक्ने उनीहरूको तर्क थियो । तर, संसदीय दलको बैठकले छानबिनका लागि सीआईबीसहितका सरकारी संयन्त्र नै सक्षम रहेको सन्देश दिएको छ ।

कांग्रेसले घटनाबारे निष्पक्ष, स्वतन्त्र र गहिराइमा पुगेर छानबिन गरी घटनामा संलग्न जोसुकै भए पनि अभियोजन गरी कानुनी दायरामा ल्याउन आग्रह पनि गरेको छ ।

"...यस्ता कार्यमा संलग्न जोसुकै भए पनि अनुसन्धान, छानविनको दायरा भित्र ल्याई कानुनी कारबाही गर्नु पर्दछ । यस्ता प्रकृतिका अपराधजन्य कार्यका लागि अनुसन्धान, छानबिन र अभियोजन गर्ने प्रयोजनका लागिनै गठित भएको केन्द्रीय अनुसन्धान ब्युरो लगायत सरकारी निकायहरूले छानबिन अनुसन्धान गरी रहेको छ । नेपाली कांग्रेस संसदीय दलको यो बैठक नेपाल सरकारलाई यस घटनाबारे निष्पक्ष, स्वतन्त्र र गहिराइका साथ अनुसन्धान, छानबिन गरी घटनामा संलग्न जो सुकै भए पनि अभियोजन गरी कानुनी दायरामा ल्याउन अनुरोध गर्दछ," कांग्रेसले भनेको छ ।