विराटनगर । कोसी प्रदेशसभाको बैठक सञ्चालन गर्ने विषयमा मुख्यमन्त्री उद्धव थापा र उपसभामुख सिर्जना दनुवारबीच आइतबार छलफल भएको छ । जारी अधिवेशनको बैठक सञ्चालन गर्ने विषयमा छलफल भएको मुख्यमन्त्रीको सचिवालयले जनाएको छ ।

त्यसक्रममा थापाले यही साउन ३२ वा भदौ १ गते बैठक सञ्चालन गर्नेबारे उपसभामुखसँग सुझाव मागेका थिए ।

तत्कालीन मुख्यमन्त्री हिक्मत कार्कीले विश्वासको मत लिने प्रयोजनका लागि असार १५ गते बैठक बसेको थियो । कार्कीले विश्वासको मत प्राप्त गर्न नसकेपछि नेकपा (एमाले) नेतृत्वसको सरकार ढलेको थियो । त्यसपछि सूचना टाँस गरी प्रदेशसभा बैठक स्थगित गरिएको थियो ।

कार्कीले विश्वासको मत नपाएपछि सभामुख बाबुराम गौतमको हस्ताक्षरसहित सरकार गठनमा बहुमत पुर्‍याएको विषय असंवैधानिक भएको भन्दै सर्वोच्च अदालतले प्रक्रिया बदर गरिदिएको थियो । साउन १६ गते गौतमले सभामुख पदबाट राजीनामा दिएसँगै गठबन्धनबाट बहुमत पुर्‍याई पुनः नेपाली कांग्रेसका उद्धव थापा मुख्यमन्त्री नियुक्त भए ।

अध्यादेशमार्फत पूर्ववर्ती एमाले नेतृत्वको सरकारले ल्याएको बजेट प्रतिस्थापन गर्ने र मुख्यमन्त्री थापाले विश्वासको मत लिन सभाको बैठक सञ्चालन हुने कांग्रेसका प्रमुख सचेतक भूपेन्द्र राईले बताए । यस विषयमा गठबन्धनका दलहरूबीच पनि छलफल भएको राईले जानकारी दिए ।

• कोसीमा बजेट प्रतिस्थापन गर्ने सरकारको तयारी, यस्तो छ एमालेको रणनीति