काठमाडौं । नेपाल नागरिक उड्डयन प्राधिकरणले नेपालमा उडान गर्ने एयरलाइन्स कम्पनीहरूको वित्तीय अडिट सुरु गरेको छ । पछिल्लो समय एयरलाइन्स कम्पनीको वित्तीय अवस्था कमजोर देखिन थालेपछि प्राधिकरणले वित्तीय अडिट सुरु गरेको हो ।

वित्तीय अवस्था कमजोर हुँदा हवाई सुरक्षामा गम्भीर असर पर्ने देखिएपछि प्राधिकरणले वित्तीय अडिट गरिरहेको छ । वित्तीय अवस्था कमजोर हुँदा एलाइन्सको सामान खरिदमा कम्परमाइज (सम्झौता) हुने र त्यसले गर्दा एयर नेभिगेसन सेफ्टीमा गम्भीर असर पर्ने भन्दै प्राधिकरणले वित्तीय अडिट  गर्नु परेको प्राधिकरणका सहप्रवक्ता ज्ञानेन्द्र भुलले बताए । 

“सबै कम्पनीको वित्तीय अडिट गर्ने काम जारी छ । बक्यौता तिर्न बाँकी रहेका कम्पनीलाई समयमा तिर्नुस् भनेर पत्र पठाउँछौं,” भुलले भने, “हामी कुनै कम्पनीमाथि प्रतिशोध र पूर्वाग्रही भएर काम गर्दैनौँ । समयमा बक्यौता नतिर्ने कम्पनीको उडान ग्राउन्डेड हुन्छ ।” प्राधिकरणलाई तिर्नुपर्ने बक्यौता रकम बाँकी रहेका सम्पूर्ण कम्पनीको उडान रोकिने भुलले जानकारी दिए । 

बुद्ध एयरबाहेक अन्य कम्पनीको गत आर्थिक वर्षको बक्यौता  बाँकी रहेको प्राधिकरणका प्रवक्ता जगन्नाथ निरौलाले जानकारी दिए । तर, सिम्रिक एयरले भने अघिल्लो आर्थिक वर्षको बक्यौता पनि तिर्न बाँकी रहेको उनले बताए । बक्यौता रकम तिर्नको लागि पटकपटक आग्रह गर्दा पनि अटेरी गरेपछि उडानमा रोक लगाएको उनको भनाइ छ । 

बक्यौता तिर्न बाँकी रहेका अन्य कम्पनीलाई समयमा तिर्न पत्राचार गर्ने तयारी भइरहेको निरौलाले जानकारी दिए । समयमा रकम नतिर्ने सबै कम्पनीलाई एकै प्रकारको कारबाही हुने निरौलाको भनाइ छ । 

दुई कम्पनीको उडान ग्राउन्डेड

प्राधिकरणले अहिलसम्म वित्तीय अवस्था कमजोर रहेको र प्राधिकरणलाई बक्यौता नतिर्ने दुईवटा एयर कम्पनीको उडान ग्राउन्डेड (उडानमा रोक) गरिदिएको छ ।

यसअघि, प्राधिकरणले चार करोड ५० लाख बक्यौता रकम नतिरेपछि गुण एयरको उडानमा प्रतिबन्ध लगाएको थियो । गुण एयरलाइन्सको वित्तीय ‘अडिट’ कमजोर देखिएपछि माघ महिनादेखि उडानमा रोक लगाएको हो ।

प्राधिकरणका अनुसार गुण एयरलाइन्सले प्राधिकरणलाई चार करोड ५० लाख रुपैयाँ तिर्न बाँकी छ । कर्मचारीलाई लामो समयदेखि तलबभत्ता नदिएको र बोर्डिङ पास छपाइको भुक्तानी बाँकी रहेको प्राधिकरणको अडिटमा देखिएको थियो ।

गुणसँग अहिले १८ सिट क्षमताको सातवटा विमान छन् । जसमा यती एयरलाइन्ससँग किनेको पाँचवटा जेट स्ट्रिम विमान र दुईवटा पुरानो सिम्रिक एयरलाइन्ससँग रहेको बिचक्राफ्ट विमान छ ।

प्राधिकरणले बिहीबार एकमात्र सिम्रिक एयरको उडानमा प्रतिबन्द लगाएको थियो । सिम्रिकसँग दुईवटा बेल र दुईवटा एएस ३५० गरेर चारवटा हेलिकोप्टर छन् । प्राधिकरणलाई ४६ लाख रुपैयाँ बक्यौता रकम तिर्न पटकपटक आग्रह गर्दा पनि नतिरेपछि शुक्रबारदेखि उडानमा प्रतिबन्द लगाएको छ ।